Игорь Юргины Арассыыйа Үөрэҕириитин министиэристибэтигэр үлэҕэ ыҥырдылар

СӨ ыччат дьыалаларыгар уонна социальнай коммуникацияларга миниистир эбээһинэһин толорооччу, Арассыыйа Дьоруойа Игорь Юргин Арассыыйа Үөрэҕириитин министиэристибэтигэр департамены салайар буолуоҕа. Бу туһунан Ил Дархан Айсен Николаев телеграм-ханаалыгар иһитиннэрэр.

«РФ Үөрэҕириитин миниистирэ Сергей Сергеевич Кравцов Саха сиригэр кэлэ сылдьан Игорь Васильевич Юргины министиэристибэҕэ иитэр бэлиитикэҕэ эппиэттиир сүрүн департамены салайарга ыҥырда. «Дьоруойдар кэмнэрэ» бырагыраамаҕа үөрэнэ, онтон бырабыыталыстыбаҕа үлэлии сылдьан Игорь Васильевич бэйэтин эппиэтинэстээх, аһаҕас киһи быһыытынан көрдөрдө. Киниэхэ настаабынньыктаабытым миэхэ чиэс буолар. Саха сириттэн ылбыт уопута кини бүтүн дойду туһугар үлэлииригэр туһалыаҕа диэн эрэнэбин», — диэн Ил Дархан Айсен Николаев эттэ.

Игорь Юргин 2024 сыл балаҕан ыйын 23 күнүттэн СӨ ыччат дьыалаларыгар уонна социальнай коммуникацияларга миниистир эбээһинэһин толорор.