II Наахара уонна II Тыыллыма нэһилиэктэригэр саҥа дьиэлэр дьэндэйэллэр

Мэҥэ Хаҥалас улууһугар хаарбах дьиэттэн көһөрүү бырагыраамата үгүс нэһилиэктэри хабан үлэлиир.

Балаҕан ыйын 12 күнүгэр улуус баһылыгын тутууга солбуйааччыта Василий Филиппов уонна тутуу салалтатын салайааччыта Илья Григорьев II Наахара уонна II Тыыллыма нэһилиэктэригэр тахсан саҥа дьиэлэр тутууларын хаамыытын билистилэр.

II Наахара дьаһалтатын дьиэтигэр салайааччылар уонна нэһилиэк баһылыга Петр Никитин кыттыылаах улахан мунньахха дьон тоҕуоруһа муһунна. Көһөрүү бырагырааматынан сылын аайы ууга барар уонна хаарбах дьиэлээх дьон хабыллыбыттар. Нэһилиэккэ үс этээстээх саҥа таас дьиэ быйыл балаҕан ыйын бүтүүтэ тутуллан бүтэн үлэҕэ киириэхтээх. Манна 23 ыал хаарбах туруктаах уопсай дьиэлэртэн көһөн киирэллэрэ күүтүллэр.

Нэһилиэккэ бу үс мэндиэмэннээх дьон олорор бастакы таас дьиэтэ буолар. Онон олохтоохтор үөрүүлэрэ үгүс. Ону таһынан салайааччылар, сылын ахсын сааскы халаан уутугар барар дьону дьиэнэн хааччыйыы боппуруостарын сыныйан көрдүлэр. Олохтоохтор санааларын болҕойон иһиттилэр.

Сокуон быһыытынан сааскы халаан уутуттан эмсэҕэлиир гражданнарга харчынан компенсация көрүллэр. Тыа дьоно сүрүннээн хаһаайыстыбаларыттан, хотонноруттан арахсыбат санааттан, олорор сирдэрин үрдэтиннэрэн, саҥа дьиэ туттар кыахтаахтарын дуу, суоҕун дуу, биитэр үрдүк сиргэ саҥа учаастак ылан дьиэ туттуохха сөп дуу диэн ыйыттылар.
Салайааччылар сокуон быһыытынан ханнык суолу-ииһи тобулуохха сөбүн дьоҥҥо-сэргэҕэ сиһилии сүбэлээтилэр.

Салгыы оробуочай бөлөх II Тыыллыма нэһилиэгэр тахсан саҥа 8 кыбартыыралаах 2 этээстээх таас дьиэ тутуутун хаамыытын көрдө-иһиттэ, билистэ.

Сотору былааннаммыт болдьоҕор лоп-бааччы, барыта олоххо киирэн, нэһилиэктэрбит олохтоохторо саҥа дьиэҕэ-уокка көһөн үөрүүлэрэ үксүө диэн Мэҥэ Хаҥалас улууһун дьаһалтатын пресс-сулууспата иһитиннэрэр.