Ытырыык ыт дьахтарга саба түстэ

Бэҕэһээ, тохсунньу 7 күнүгэр, «Үрдэл” сынньалаҥ пааркаҕа ыт дьахтарга саба түспүт.

Ытырыык ыттан дьахтары нэһиилэ араардыбыт диэн социальнай ситимҥэ суруйбуттар. “Үрдэл” паарка үлэһиттэрэ суһаллык ыты быстах кэмҥэ тутар пуун үлэһиттэрин ыҥырбыттар. Бэлиэтээн суруйдахха, дьахтарга саба түспүт ыт моонньугар моойторуктаах. Ол эбэтэр хаһаайыннаах ыт буолуон сөп диэн сабаҕалыыллар. Биһиги Дьокуускай куораттааҕы «Помоги выжить» диэн ыты быстах кэмҥэ тутар пуун салайааччыта Екатерина Безрученкоҕа сибээскэ таҕыстыбыт:

— Бэҕэһээҥҥи ыты сайаапканан биһиги үлэһиттэрбит тутан аҕалбыттара. Ол тутан баран быалаан хааман истэхтэринэ, алабай ырдьыгыныы испит үһү. Хата, саба түспэтэх. Үлэһиттэрбит араас майгылаах ыттары кытта үлэлии уопуттаахтар диэн этиэххэ наада. Аҕалаат, саҥа блокпутугар оҥоһуллубут вольерга хаайдыбыт. Алабай моойторуктаах. Ыт уруккута хаһаайыннаах буолуон сөп. Майгыта алдьаммыт. Өр аччык тоҥо-хата сылдьыбыт буолуон сөп. Маннык боруода ыт биир эрэ хаһаайыны билинэр. Быһата, эрэйи көрбүт ыт диэн көрдүбүт. Кэтээн көрүөхпүт. Хаһаайыттара ирдэһэ кэлэллэрин саарбахтыыбын.