Иирсээн кэмигэр суотабайы уорбут

ИДьМ Дьокуускайдааҕы салаатын  пресс-сулууспата иһитиннэрбитинэн, полиция 2 нүөмэрдээх отделын дьуһуурунай чааһыгар суотабай төлөпүөнүн уордарбыт эр киһиттэн сайабылыанньа киирбит. 

Суһал-ирдиир үлэ кэмигэр  холуобунай ирдэбил үлэһиттэрэ уорбаланааччыны — 31 саастаах Горнай олохтооҕун туппуттар.

Ол курдук  түөрт эр киһи тэллэйдии ойуурга тиийэн баран, арыгылаабыттар.  Онно эмсэҕэлээччи улаханнык билсибэт киһитин кытары  айдаарсыбыт.  Араллаан кэмигэр  эмсэҕэлээччи хармааныттан суотабайа түспүтүн, уорбаланааччы ылбыт.

Төлөпүөнү кэлин эр киһи комиссионнай маҕаһыыҥҥа туттарбыт уонна харчытын арыгыга бараабыт.

Билигин  31 саастаах Горнай олохтооҕор РФ Холуобунай кодексын 158 ыст. 2 чааһынан холуобунай дьыала көбүтүллүбүт. Инньэ гынан уоруйах көҥүлэ биэс сылга диэри быһыллыан сөп.