Иирсээн түмүгэ — алдьаммыт видеорегистратор

Бу күннэргэ социальнай ситимҥэ  итирик туруктаах уолаттар  айаннаан иһэн суоппары кытта  айдаарсыбыт    видеолара тарҕанна. Туһааннаах иирсээн тохсунньу 2 күнүгэр тахсыбыт.

Ис дьыала министиэристибэтин Дьокуускайдааҕы управлениетын пресс-сулууспата  суруйарынан, Дьокуускайдааҕы полиция 2 нүөмэрдээх отделыгар  38 саастаах суоппартан  иһитиннэрии  киирбит. Ол курдук суоппар Короленко уулуссаттан Севернай уулуссаҕа диэри  пассажирдары илдьибит.  Айаннаан иһэн  итирик туруктаах  биир пассажир автомагнитоланы холбуурга модьуйбут. Онуоха суоппар аккаастаабытыгар, иннитигэр олорсон испит   пассажир   суоппары  охсубут уонна  видеорегистраторы алдьаппыт.

Барыллааһын быһыытынан  массыына  лобовой өстүөкүлэтэ уонна   видеорегистратор алдьаммыт. Билигин бэрэбиэркэ ыытыллар.