Евдокия Ноева: «Волонтердар элбээн иһэбит»

Евдокия Ноева: «Волонтердар элбээн иһэбит»

08.03.2023, 13:00
Бөлөххө киир:

Саха сирин ийэлэрэ ис сүрэхтэриттэн байыаннай дьайыылар саҕаланыахтарыттан көмөлөһөн барбыттара. Бүгүн кинилэр, көмүс сүрэхтээх волонтер-дьахталлар – аан дойду аанньаллара тыһыынчанан саллаат уолаттар ийэлэрэ, эрэллээх тыыллара буолаллар. Аан дойдутааҕы дьахталлар бырааһынньыктарынан, кинилэр тустарынан кэпсиир тоҕоостоох дии саныыбын.

Евдокия Владимировна Ноева.

Евдокия Владимировна Санкт-Петербурга 40-тан тахса сыл олорор. Кини сүрдээх элэккэй, үтүө санаалаах, дьону түмэр, кэпсэтэр дьоҕурдаах киһи, Хаҥалас улууһун Булгунньахтааҕыттан төрүттээх, уопсастыбанньык, «Дом национальных культур» АУОТ Президиумун чилиэнэ, «Лига Наций Санкт-Петербурга» сэ­­биэт чилиэнэ. 2003 сыллаахха «Знаменитые личности Санкт-Петербурга» энциклопедияҕа кини аата киирэн турар итэннэ «В память 300-летия Санкт-Петербурга» мэ­­тээлинэн наҕараадаламмыта. Уопсастыбаннай үлэни өрө туппут киһи, «Женщина года-2019» бастыҥ ааты ылары ситиспитэ. Итиэннэ хас да сыл «Эйэ илдьитэ» буолан,  Франция Тулуза куоратыгар Арассыыйа норуоттарын кэмпириэнсийэтигэр кыттан, Саха сирин олоҕун-дьаһаҕын, култууратын Парижка, Бахрейҥҥа көрдөрбүтэ. Евдокия Владимировна үлэтин таһынан волонтердары сүрүннүүр.

«Мин «Маккаби» диэн Арассыыйа-Еврейскэй успуорт тэрилтэтигэр генеральнай дириэктэринэн үлэлиибин. Кэргэним Вадим Полянскай «Маккаби» тэрилтэ салайааччыта, онно көмөлөһөбүн.

Волонтердар элбээн иһэбит, 20-чэ буоллубут. Үгүспүт бэйэм үөлээннээхтэрим, эдэр дьону, устудьуоннары эмиэ тардан эрэбит. Манна госпиталга сытар уолаттарбытыгар күүс-көмө, сүбэ-ама буоларга биһиги, саастаахтар, ийэлии, эбэлии сыһыаммыт ордук курдук. Түгэнинэн туһанан, волонтер кыргыттарбын Варвара Илларионованы, Таисия Тарасованы, Антонина Кондакованы, Мария Винокурованы, Альбина Коминаны, Зинаида Шильникованы, Аристина Архипованы, Атласовтар дьиэ кэргэннэрин ааттыахпын баҕарабын. Сүрүн көмөлөһөөччүлэринэн Наталья Иванова, Ирина Данилова, Тоня Кондакова буолаллар, кинилэр эмиэ 70-с сылларга Питергэ кэлэн олохсуйбуттара.

Аан бастаан Саха-Санкт-Петербург култуурунай уопсастыба бэрэсидьиэнэ Гаврил Афанасьевич Троев Байыаннай Мэдиссиинэ академиятын госпиталыгар бааһырбыт уолаттарга сылдьан саҕалаабыта. Ол кэннэ, ааспыт сыл балаҕан ыйыттан, биһиги күн бүгүнүгэр диэри уолаттарбытыгар өйөбүл буолабыт, ас астаан илдьэбит, наадаларын быһаарсабыт. Саха да, нуучча да буоллун, бары биһиэхэ оҕолорбут курдуктар. Маннык сыһыантан, истиҥ кэпсэтииттэн, уолаттар санаалара көнньүөрэр, олоххо тардыһыылара күүһүрэр. Уолаттарбытын дойдуларыгар атаарарбытыгар ардыгар сайыһа хаалабыт, уйадыйан ылабыт.

Биһиги «Волонтеры-Саха-Питер» диэн бөлөхтөөхпүт, туох наадатын  онно суруйсабыт, быһаарсабыт. Саха сириттэн көмө кэминэн кэлэ турар. Ол курдук, олунньу 23 күнүгэр Үөһээ Бүлүү улууһун бэтэрээннэрэ уонна волонтердара госпиталга сытар уолаттарга 88 кг бородуукта ыыппыттара. Онтон Саҥа дьыл иннинэ таатталар уонна чурапчылар итинник көмөнү оҥорбуттара. Ким даҕаны туора турбакка, уолаттарбыт этэҥҥэ эргиллэн кэлэллэрин, Кыайыы иһин, бары кыахпытынан көмөлөһөбүт», – диэн Евдокия Ноева кэпсээтэ.

+1
0
+1
0
+1
0
+1
0
+1
0
+1
0
+1
0
Бары сонуннар
Салгыы
15 апреля
  • -15°C
  • Ощущается: -15°Влажность: 56% Скорость ветра: 1 м/с

Сообщить об опечатке

Текст, который будет отправлен нашим редакторам: