“Ийэ дойду туохтан саҕаланар?”

Биллибэт саллаат уонна Арассыыйа Дьоруойдарын күннэригэр аналлаах “Ийэ дойду туохтан саҕаланар?” өрөспүүбүлүкэтээҕи патриотическай пуорум кадеттар оскуола-интэринээттэригэр аһылынна.  

Бастакы этээс фойетыгар генерал-майор В.П. Куценко хартыыналарын көһө сылдьар быыстапката, “Биһиги өйдүүбүт” олохтоох ааптардар кинигэлэрин быыстапката туруоруллубут.

Кадеттар оскуола-интэринээттэрэ бу тэрээһини сыллата ыыталлар, быйыл номнуо 11-с төгүлүн буолар. Бу күн кинилэр Социалистическай Үлэ дьоруойдарын, Үлэ дьоруойдарын, РФ Дьоруойдарын, ССРС дьоруойдарын, Сибэтиэй Георгий уонна Албан Аат уордьаннар толору кавалердарын, байыаннай дьайыылар бэтэрээннэрин кытта көрсөллөр, чиэстииллэр. Бу тэрээһиҥҥэ бэтэрээннэр тэрилтэлэрэ, бойобуой дьайыылар бэтэрээннэрэ, үлэ бэтэрээннэрэ кэлэн, көхтөөх кыттыыны ылаллар. Быйыл пуорумҥа Уус Алдан, Нам, Хаҥалас, Горнай, Мэҥэ Хаҥалас улуустарыттан уонна Дьокуускай к. дэлэгээссийэлэр кэлбиттэр.

Пуорум үөрүүлээх аһыллыытыгар мустубут дьону, бэтэрээннэри Ил Дархан, бырабыыталыстыба дьаһалтатын салайааччыта Г.Н. Михайлов, Ил Түмэн Бэрэссэдээтэлин солбуйааччы А.С. Владимиров, СӨ Ыччат уонна дьиэ кэргэн дьыалалрыгар миниистир э.т., РФ Дьоруойа И.В. Юргин, Бэтэрээннэр өрөспүүбүлүкэтээҕи сэбиэттэрин бэрэссэдээтэлэ В.О. Иванов, о.д.а. эҕэрдэлээтилэр, кыайыыны уһансыбыт көлүөнэни салгыыр Ийэ дойдуларын иһин ытык иэстэрин төлүүр бойобуой көлүөнэҕэ махталларын биллэрдилэр.

Ил Дархан, бырабыыталыстыба дьаһалтатын салайааччыта Георгий Михайлов бу пуорум атыттартан уратылааҕын тоһоҕолоон бэлиэтээтэ:

“Саҥа кадетскай оскуола-интэринээт базатыгар буола турар патриотическай тэрээһин уратыта диэн, манна бэтэрээннэр, ыччаттар, оскуола үөрэнээччилэрэ, байыаннай дьайыылар кыттыылаахтара бары бииргэ хамаанда тэринэн кытталлар, күрэхтэһэллэр. Көлүөнэттэн көлүөнэҕэ бэриллэр патриотизм туһунан өйдөбүллэр бу маннык тэрээһиннэргэ ис хоһоонноро өссө күүһүрэн, чуолкайданан биэрэр. Олоҕу олорбут, үлэ бөҕөнү көрсүбүт көлүөнэ Ийэ дойдуларыгар тапталларын үүнэр көлүөнэҕэ иҥэрэллэр, урукку кэмнэри ахталлар, сэрии хонуутугар эрэ буолбакка, тыылга оҥоһуллубут хорсун быһыылары кэпсииллэр. Бу барыта пуоруму ураты тыынныыр, көлүөнэлэри ситимниир”.

Үөрүүлээх аһыллыы кэнниттэн  патриотическай иитиинэн дьарыктанар араас тэрилтэлэр исписэлиистэрэ төгүрүк остуол тула мустан, улуустарга туох үлэлэр бара туралларын кэпсэттилэр, туох тиийбэтин, өссө тугу оҥоруохха сөбүн, баар кыһалҕалары быһаарыстылар. “Биһиги уопсай кыайыыбыт-80” өрөспүүбүлүкэтээҕи аахсыйа ыытыллыытын дьүүллэстилэр, саҥа көлүөнэ ыччаты патриотическай иитиигэ саҥа ньымалары киллэриигэ уопуттарын атастастылар. Форсайт сиэссийэҕэ бастыҥ патриотическай бырайыактары көрдөрдүлэр.