Ийэ дойдуну көмүскээччи сылын аһар бэлиэ тэрээһин буолла

Тохсунньу 29 күнүгэр Ю.А.Гагарин аатынан култуура уонна аныгы ускуустуба киинигэр Саха Өрөспүүбүлүкэтигэр Оҕо саас сылын түмүктүүр уонна Ийэ дойдуну көмүскээччи сылын аһыллыытыгар аналлаах үөрүүлээх тэрээһин буолан ааста.

«Бүгүн Оҕо саас сылын түмүктүүбүт, Ийэ дойду көмүскээччилэрин сылын арыйабыт. Бу чахчы суолталаах тэрээһин. Оҕо саас сылыгар туруоруллубут бары биир сорук тула түмүстүбүт – дьоллоох, куттала суох оҕо саас тула. Тоҕо диэтэххэ, оҕо аймах – биһиги кэскилбит. Министиэристибэлэр бары күүспүтүн холбоон бэйэбит кылааппытын киллэрдибит. Былырыын биһиги төрөөбүт тылынан тахсар “Тооку” оҕо ханаал үлэтин саҕалаабыппыт. Бу контент нөҥүө оҕолорго төрөөбүт дойдуга тапталы, патриотизм тыынын иҥэрэбит.

Оҕо саас сылыттан Ийэ дойдуну көмүскээччи сыла биллэриллэрэ ураты, бэлиэ. Оҕолорбутун патриотическай тыыҥҥа иитиэхтээхпит», – диэн Бырабыыталыстыба бэрэссэдээтэлин солбуйааччы Анатолий Семенов эттэ.

Бэрэссэдээтэли солбуйааччы Анатолий Семенов Оҕо саас сылын тэрийиигэ улуустар уонна куорат уокуруктарын икки ардыларыгар ыытыллыбыт күрэс кыайыылаахтарыгар – Горнай, Таатта, Томпо, Ленскэй улуустарыгар уонна Жатай куораттааҕы уокурукка сэртипикээттэри туттарда.

Үөрэх уонна билим миниистирэ Нюргуна Соколова Ийэ дойдуну көмүскээччи сылын бэлиэтин Ыччат дьыалаларыгар уонна социальнай коммуникацияларга миниистир эбээһинэһин толорооччу Игорь Юргиҥҥа туттарда.

Аҕа дойду Улуу сэриитин бэтэрээнэ, СӨ норуодунай учуутала, РСФСР уонна Саха АССР үтүөлээх учуутала Николай Иванович Афанасьев видеонан эҕэрдэтин ыытта.

Саха сирин айылҕаттан талааннаах ырыаһыт, үҥкүүһүт оҕолоро, ыччаттара, үлэһиттэрэ бары бу күн, бу уораҕайга мустубуттар дуу диэбиттии бииртэн-биир ураты, чаҕылхай, умнуллубат нүөмэрдэри көрдөрдүлэр.