Ийэ дойдуну көмүскээччилэр сырдык кэриэстэригэр бильярдка күрэхтэһии буолла

Ааспыт нэдиэлэҕэ Дьокуускайга бильярднай успуорка алтыс төгүлүн өрөспүүбүлүкэтээҕи турнир буолла. Бу күрэхтэһии Аҕа дойду Улуу сэриитин кыттыылааҕа Егор Балбахов уонна байыаннай дьайыы кыттыылааҕа Айаал Балбахов сырдык кэриэстэригэр анаан ыытылынна.

Сүрүн тэрийээччи Виссарион Балбахов турнир туһунан маннык кэпсиир:

— 2015 сыллаахха абаҕам, Аҕа дойду Улуу сэриитин кыттылааҕа Егор Егорович Балбахов көмүс уҥуоҕа Псковка көмүллэн сытарын булбутум. Кини Өлүөхүмэ улууһун Улахан Муҥку нэһилиэгиттэн ыҥырыллан сэриигэ барбыт уонна баара-суоҕа 25 эрэ сааһыгар кыргыһыы хонуутугар охтубут. Мин бильярдынан сөбүлээн дьарыктаммытым уонча сыл буолла. Доруобуйаларыгар хааччахтаах дьон икки ардыгар ыытыллар күрэхтэһиилэргэ куоракка, өрөспүүбүлүкэҕэ уонна Уһук Илиҥҥэ кэккэ ситиһиилэрдээхпин. Онон абаҕам аатын үйэтитэр сыаллаах 2015 сылтан бильярдка өрөспүүбүлүкэтээҕи турниры тэрийбитим. Турниры туораттан биир да өйөбүлэ суох дьиэ кэргэмминээн, Балбаховтар буолан ыытабыт.

Пандемияҕа диэри этэҥҥэ ыытан баран, 2022 сылга сөргүтэн эмиэ тэрийээри сырыттахпытына, бииргэ төрөөбүт быраатым уола Айаал Балбахов быстах хомуурга ыҥырыллан, байыаннай дьайыыга кытта барбыта. Уолбут Ийэ дойдутун көмүскүү сылдьан, 28 сааһыгар Донбааска сырдык тыына быстыбыта. Айаал Улахан Муҥкуга алын кылаастарга үөрэнэн баран, оскуолатын Үҥкүр нэһилиэгэр бүтэрбитэ. Салгыы Дьокуускайга кэлэн тутуу кэллиэһигэр үөрэнэн, үс идэни баһылаабыта. Онтон Благовещенскайга аармыйаҕа муора пехотатыгар сулууспалаан, «снайпер-стрелок» буолбута. Дьокуускайга кэлэн чааһынай тэрилтэҕэ миэбэл оҥорооччунан үлэлээбитэ. Быстах хомуурга ыҥырыллыан иннинэ ийэтин дойдутугар Дьааҥы Элгэһигэр сыл аҥаара курдук эдьиийигэр олорон, үлэлээбитэ, уһаммыта. Кини эдэр киһи диэтэххэ барыны-бары кыайара, маһынан, тимиринэн сатабыллаахтык уһанара, уруһуйдуура, уот тардара. Тыына быстыбытын кэнниттэн РФ Бэрэсидьиэнэ Владимир Путин ыйааҕынан «Эр санаалаах буолуу» уордьанынан наҕараадаламмыта.

Онон абаҕабыт аатынан бильярдпыт турнирыгар уолбут Айаал аатын эмиэ киллэрэн, быйыл үрдүк тэрээһиннээх күрэхтэһиини ыыттыбыт. Үс күн устата хотуттан-соҕурууттан 130-ча  киһи кэлэн көхтөөхтүк кытынна. Биһиэхэ күүс-көмө буолбут Бильярднай успуорт федерациятын салайааччытыгар Андрей Никифоровка, “Леман” кулууп, «Эллэй Боотур» бильярднай кулуубун салайааччыларыгар махтанабыт.

Күрэхтэһээччилэри үс категорияҕа — 50 саастарыгар диэри, 50-нарыттан үөһээ саастаах уонна 60-нарыттан үөһээ саастаах дьоҥҥо диэн арааран ыыттыбыт.

60-нарыттан үөһээ саастаахтарга:
1 миэстэ — Федоров Юрий, Үөһээ Бүлүү;
2 миэстэ — Иванов Алексей, Өлүөхүмэ;
3 миэстэ — Варламов Александр, Үөһээ Бүлүү;
3 миэстэ — Евсеев Иосиф, Сунтаар.

50-нарыттан үөһээ саастаахтарга:
1 миэстэ — Габышев Евгений, Кэбээйи;
2 миэстэ — Козлов Анатолий, Үөһээ Бүлүү;
3 миэстэ — Софронов Андрей, Дьокуускай;
3 миэстэ — Максимов Дмитрий, Бүлүү.

50 саастарыгар диэри:
1 миэстэ — Молдагулов Тимур, Мэҥэ Хаҥалас;
2 миэстэ — Баишев Евгений, Чурапчы;
3 миэстэ — Эверстов Алексей, Дьааҥы;
3 миэстэ — Софронов Андрей, Дьокуускай.

Супер-финалга 60-нарыттан үөһээ саастаах дьоҥҥо  Үөһээ Бүлүүттэн сылдьар Юрий Федоров, оттон 50-нарыттан үөһээ саастаах дьоҥҥо Кэбээйиттэн сылдьар Евгений Габышев кыайдылар. Итиэннэ саамай эдэр кыттааччы аатын Дьокуускайтан сылдьар үһүс кылаас үөрэнээччитэ Никита Семенов, оттон 80 сааһыттан тахсыбыт Дьокуускай бэтэрээнэ Николай Бугуев саамай аҕа саастаах кыттааччы аатын ыллылар. Афганистан сэриитин кыттыылааҕар Семен Семеновка анал бириис туттарылынна.