Ийэ хапытаалын 2030 сыл бүтүөр диэри уһаттылар

Госдуума дьокутааттара пленарнай мунньахха ийэ хапытаалын бырагырааматын 2030 сыл ахсынньы 31 күнүгэр диэри уһатар туһунан сокуон ылыннылар.

Бу туһунан ТАСС суруйар. Сокуон барыла РФ Бырабыыталыстыбатынан былырыын ахсынньы 19 күнүгэр Госдуума көрүүтүгэр киллэриллибитэ.

Быһаарыы сурукка этиллэринэн, Арассыыйаҕа 2027 сылтан 2030 сылга диэри 5 мөл. кэриҥэ дьиэ кэргэн ийэ хапытаалын бырагырааматынан туһаныахтара. Барыллаан ааҕыынан, сокуон барылын олоххо киллэриигэ 2027-2030 сылларга бүддьүөттэн уопсайа 2,776 трлн солк. ирдэнэр.

Ийэ хапытаала «Демография» национальнай бырайыак чэрчитинэн үлэлиир. 2020 сылтан ийэ хапытаалын төлөбүрэ бастакы оҕо төрөөтөҕүнэ бэриллэр. 2024 сылга индексацияланан ийэ хапытаалын кээмэйэ бастакы оҕоҕо — 630 тыһ.солк. этэ, иккис оҕоҕо — 833 тыһ. солк. тэҥнэһэр.