Ийэ хапытаалын сэртипикээтин 2,3 тыһыынча киһи тутта

СӨ Социальнай пуондата бу сылга ийэ хапытаалын сэртипикээтин Саха сирин 2291  олохтооҕор туттарбыт. Бу туһунан бүгүн, брифинг кэмигэр, пуонда салайааччыта Марина Герман иһитиннэрдэ.

«2025 сылга бастакы оҕоҕо бэриллэр ийэ хапытаалын кээмэйэ 690 266, 95 солкуобайга тэҥнэһэр. Оҕо 2020 сыл тохсунньу 1 күнүн кэннэ төрөөбүт эбэтэр иитиллэ ылыллыбыт буолуохтаах. Өскөтүн, эрдэ төрөппүттэр бастакы оҕолоругар ийэ хапытаалын ылбыт буоллахтарына, иккис оҕоҕо 221 895 солкуобайы эбии ылыахтарын сөп», — диэтэ кини.

Маны таһынан Марина Герман бэлиэтииринэн, быйылгы дьыл бэс ыйын 7 күнүттэн ийэ хапытаалын туһаныыга сайабылыанньаны көрүү болдьоҕо уларыйбыт. Билигин быһаарыыны Социальнай пуонда биэс үлэ күнүн устата көрөр буолбут.

Өскөтүн, ийэ хапытаалын туһанан баран сэртипикээккэ 10 000 cолкуобай хаалбыт буоллаҕына, бу  харчыны биирдэ бэриллэр көмө быһыытынан ылыахтарын сөп.