Ийэ хапытаалын тобоҕун ылан туһанар кыах баар

Социальнай пуонда Саха сиринээҕи салаата ийэ хапытаалын тобоҕун туһана илик 1018 дьиэ кэргэҥҥэ 4,2 мөлүйүөн солкуобай суумалаах үбү-харчыны төлөөтө. Бу туһунан Социальнай пуонда салаатын салайааччыта Марина Герман брифиҥҥэ кэпсээтэ. 

— Ийэ хапытаалын тобоҕо 10 тыһыынча солкуобайтан тахсыбат эрэ буоллаҕына төлөнөр. Хапытаал тобоҕо бу сууматтан элбэх буоллаҕына, төлөммөт, — диэн Марина Герман эттэ.

Ийэ хапытаалын тобоҕо төһө хаалбытын «Госуслуги» порталга тус кэбиниэккэ киирэн, Социальнай пуондаҕа, Элбэх өҥөнү оҥорор кииҥҥэ баран билиэххэ сөп.

— Төлөбүрү ыларга сайабылыанньа суруйуохха наада. Исписэлиистэр 10 үлэ күнүн устата көрөн, харчы 5 үлэ күнүн устата счекка түһэр. Ийэ хапытаалын тобоҕун туохха баҕарар туһаныахха сөп. Оҕо сааһыттан, дьиэ кэргэн материальнай балаһыанньатыттан тутулуга суох, төлөнөр, — диэн салайааччы эттэ.

2024 сыл саҕаланыаҕыттан балаҕан ыйын 1 күнүгэр диэри  Саха сиригэр Ийэ хапытаалыгар 3210 сэртипикээт оҥоһуллубут.

Ийэ хапытаалын суумата: бастакы оҕоҕо — 630,4 тыһыынча солкоубай, иккис оҕоҕо — эбии 202,6 тыһыынча солкуобай төлөнөр. Иккис уонна онтон кэлэр оҕо төрүөр диэри Ийэ хапытаалын ылар быраап үөскээбэтэх буоллаҕына, иккис оҕоҕо тута 833 тыһыынча солкуобай ананар.

Ил Дархан, бырабыыталыстыба пресс-сулууспата.