Ийэ хапытаалын тобоҕун ылан туһаныахха сөп

Арассыыйа дьиэ кэргэттэрэ Ийэ хапытаалын тобоҕун — 10 тыһыынча солкуобай суумаҕа тиийэ, туһанар кыахтаныахтара. Бу туһунан дойду Бэрэсидьиэнэ Владимир Путин “Это у нас семейное” куонкурус кыайыылаахтарын кытта көрсүһүүтүгэр эттэ.

Бэрэсидьиэн быһаарыытынан, сотору кэминэн сокуоҥҥа уларытыылар бэлэмнэннэхтэринэ, туһаныллыбакка хаалбыт 10 тыһыынча солкуобайга диэри сууманы биир кэмнээх төлөбүр быһыытынан ылар кыахтаныахтара. Бу сууманы таптаабыттарынан туһанар кыахтаахтар.

РФ Бырабыыталыстыбатын бэрэссэдээтэлин солбуйааччы Татьяна Голикова эппитинэн, Ийэ хапытаалыттан ороскуоттаммакка хаалбыт 10 тыһыынча солкуобайы сайабылыанньата да суох, биэриэхтэрин сөп. Кини бу сокуоҥҥа уларытыылар киириэхтээхтэр диэн бэлиэтээтэ. “Ити көмөнү сайабылыанньата суох ылар кыаҕы биэрэр судургу, биһиэхэ оннук быраап баар буоларыгар сокуоҥҥа көннөрүүлэр киириэхтэрин эрэ наада,” — диэн  Татьяна Голикова быһаарда.

Уопсайа 1,5 миллиард солкуобай кэриҥэ суумалаах туһаныллыбакка хаалбыт Ийэ хапытаалын Арассыыйа дьиэ кэргэттэригэр төлүөхтэрэ.