Ийэ хапытаалын үбүн оҕо тииһин эмтэтэргэ туһаныахха сөп

Дьиэ кэргэн уонна Оҕо саас сылларыгар Ил Дархан  Айсен Николаев ыам ыйын бүтүүтэ анал сокуоҥҥа уларыйыыны киллэрэр туһунан илии баттаата.  Ол түмүгэр, Өрөспүүбүлүкэтээҕи «Дьиэ кэргэн» Ийэ хапытаалын туһанарга уларыйыы киирдэ.

Өрөспүүбүлүкэтээҕи «Дьиэ кэргэн» Ийэ хапытаалын үбүн туһанарга билигин оҕо тииһин эмтэтэргэ уонна ортодонт өҥөтүнэн туһанарга туттуохха сөп буолла.

Сороҕор оҕо тииһин эмтиэххэ эрэ буолбакка, сыҥааҕын көннөрүөххэ наада буолар. Ону оҕо уҥуоҕа кытаата илигинэ, эрдэттэн эмтиир, көннөрөр ордук. Оттон стоматолог, ортодонт быраастар өҥөлөрүн сыаналара олус ыарахан. Онуоха дьиэ кэргэҥҥэ бу хапытаал үбэ көмө буолуон сөп.

Бырабыыталыстыба сотору кэминэн туһаныы бэрээдэгин оҥоруоҕа. Саҥа көмөнөн бу сылтан туһаныахха сөп диэн Үлэ, социальнай сайдыы министиэристибэтэ иһитиннэрэр.

Санатар буоллахха, Өрөспүүбүлүкэтээҕи «Дьиэ кэргэн» Ийэ хапытаала үһүс уонна онтон кэлэр оҕо төрөөтөҕүнэ (иитэ ыллахха) ананар. Суумата быйылгыттан икки төгүл үрдээн, 300 тыһыынча солкуобайга тэҥнэспитэ.