Ийэ хапытаалынан түөкүннээбит дьон буруйданнылар

Өрөспүүбүлүкэ үс олохтооҕо Челябинскай куораттан сылдьар кирэдьиит-иэстэһэр кэпэрэтиип үлэһиттэриттэн турар тэрийиилээх буруйу оҥорор бөлөх састаабыгар киирэн, ийэ хапытаалын ссэртипикээттэрин сокуону кэһэн уу харчыга көһөрөн, төлөбүрү ыларга түөкүннээбиттэр.

Бу туһунан Саха сиринээҕи Үрдүкү Суутун пресс-сулууспата иһитиннэрэр. Атын дьоҥҥо сыһыаннаан дьыала матырыйааллара араарылыннылар. Ол курдук, буруйданааччылар 2018 сыл сэтинньититтэн 2020 сыл ахсынньытыгар диэри Дьокуускай куоракка бэйэлэрэ толкуйдаабыт албастарынан 7 төгүл сокуону кэһэн харчыны уорбуттар.

Дьыалаҕа эриллибиттэр Дьокуускай куорат араас интэринэт-ресурстарыгар уонна бөлөхтөрүгэр ийэ хапытаалын үбүн уу харчыга уларытарга «көмөлөһөллөрүн» туһунан биллэриилэри ыыталыыллара. Кинилэр ийэ хапытаалын тутааччылар олорор усулуобуйаларын, чуолаан чааһынай дьиэни туттан, тупсаралларын туһунан сымыйа сибидиэнньэлэрдээх докумуоннары бэлэмнээн, Биэнсийэ пуондатыгар туттараллар эбит. Харчыны пуондаттан ылбыттарын кэннэ, 50 000 солкуобайы өҥөнү оҥорбут иһин бэйэлэригэр тутан хаалаллара, оттон ордугун «ийэлэргэ» ыыталлара биллибит.

Итинник ньыманан сууттаммыт дьон РФ бүддьүөтүттэн 3 150 023,07 солкуобай суумалаах харчыны уоран, судаарыстыбаҕа олус бөдөҥ кээмэйдээх хоромньуну оҥорбуттар.

Бу сыл бэс ыйын 6 күнүгэр Дьокуускайдааҕы куорат суута үһүөннэрин РФ Холуобунай кодексатын 159.2 ыстатыйатын 4-с чааһынан көрүллүбүт буруйу оҥорбуттарынан буруйдаахтарынан билиммитэ. Суутунан 4 сылтан 2 сылга диэри көҥүлү быһарга уураахтаммыт Ити кэмҥэ бириигэбэри холуобунай дьыалаҕа эриллибит биир киһи албакаата үҥсүү түһэрбит. СӨҮрдүкү Суута дьыала матырыйаалларын көрөн, өрүттэр санааларын истэн баран, бастакы инстанциялаах суут бириигэбэрин уларытыыта суох, оттон албакаат үҥсүүтүн толоруута суох хаалларда.