Хаартыскаҕа Августина Владимирова-Хабарова түһэриитэ
Сахабыт сирин араас улуустарынан, куораттарынан үөрэх дьыла түмүктэнээри эксээмэннэргэ бэлэмнэниилэри таһынан хатылааһыҥҥа, чиҥэтиигэ туһааннаах уруоктар былааннаахтык ыытыллаллар.
«Лена» киинэ тыйаатырын утары, улахан өрөмүөн үлэтин кэнниттэн көһөн кэлбит 1-гы нүөмэрдээх оскуола ( дириэктэр Таисия Николаевна Горохова) 5 «Б» кылааһыгар 32 оҕо үөрэнэр. Манна СГУ ИФФ СС биир кэмҥэ устудьуоннаабыт, «Чэчир» этэрээти күн бүгүнүгэр диэри ситимниир бастыҥ байыаспыт, бу оскуолаҕа 11-с сылын айымньылаахтык үлэлии сылдьар, быйылгы үөрэх дьылыгар «Саха тылын уонна литэрэтиирэтин бастыҥ учуутала» диэн Дьокуускай куорат баһылыга Евгений Григорьев Анал бириэмийэтин хаһаайката Анна Даниловна Попова (Афанасьева) ыҥырыытынан уруокка кыттыыны ыллым.
Айар оҕолору кытта үлэлэспит, оччолорго «Бичик» билигин «Айар» кинигэ кыһатыгар ( ген. дириэктэр Август Васильевич Егоров) «Күндээр» 2001-2010 с. сэттэ төгүл бэчээттэнэн тахсыбыт кинигэҕэ киирбит оҕолор тустарынан иһитиннэриини оҥордум. Остуолларынан «Күндээр» кинигэлэрин, хаартыскалары оҕолорго көрдөрөн, биирдиилээн ыйытааччылар боппуруостарыгар хоруйдаатым. «Ылгын чыҥыйа» диэн орто саастаах оҕолорго анаан суруйбут тэттик, көрдөөх кэпсээммин Юлиана Сыромятникова дорҕоонноохтук аахпытын бэлиэтээн бэйэм сэмэй бэлэхпин туттарбыппыр, ытыс тыаһа өрө хабылла түстэ. «Арктика оҕо хараҕынан» итиэннэ өс хоһооннорунан уруһуй күрэстэригэр кыттан бириистээх миэстэлэргэ тиксибит Алина Бурнашеваҕа Вероника Сотникова оскуолаҕа сылдьан «Эркээйигэ» бэчээттэппит «Иэйии» диэн маҥнайгы кинигэтин алгыс тыллаан бэлэхтээтим. Алина наһаа үчүгэй уруһуйдьут эбит. Кини Болот Боотур » Киһиргиибин диэн кирсэ быстыбыт» остуоруйатыттан олус үчүгэйдик уруһуйдаабытын сөҕө, сэргии, астына көрдүм.
— Маҥнай бу оскуолаҕа үлэлии кэлээт, саха оҕолоро төрөөбүт тылларынан саҥарбаттарын, кэпсэппэттэрин соһуйа көрбүтүм. Ол иһин төрөөбүт төрүт тылларын сүмэтин иҥэрэр сыалы-соругу туруораммын, куолаан үөрэтии ньыматынан уус-уран ааҕыыны уруоктарбар киллэрииттэн саҕалаабытым. Билигин үөрэнээччилэрим куорат иһинэн, өрөспүүбүлүкэҕэ ыытыллар бары күрэстэргэ бириистээх миэстэлэртэн түспэттэр, — диэн Анна Даниловна үөрэтэр оҕолорун ситиһиилэрин киэн тутта кэпсиир.
Эппэр ийэм үүтүн кытта
Иҥмит эбит, быһыыта
Кустук өҥнөөх, кымыс сыттаах Сахам мындыр саҥата…— диэн Сэмэн Данилов хоһоонун доргуччу ааҕыыттан уруок саҕаланна. 5 «б» кылаастар бары биир киһи курдук тэбис-тэҥҥэ үөрэ-көтө, сирэйдэрэ-харахтара сырдаан хоһоону аахтылар. Иккис чааһыгар Эллэй
«Чурумчуку» айымньытыттан быһа тардан бары уочаратынан өйтөн дорҕоонноохтук аахтылар. Нууччалыы кэпсэтэ сылдьыбыт 5 «Б» кылааһын оҕолоругар айымньы нөҥүө ийэ тыл сүмэтин иҥэриигэ куорат биир бастыҥ үлэлээх учуутала Анна Даниловна ыыппыт бүгүҥҥү уруогар сыана быһарым буоллар «5» туруоруом этэ.
Уруок бүтүүтэ ыытыллар үлэҕэ оскуола ыһыаҕын оһуохайыгар дьарыктаннылар. Анна Даниловна быйыл оҕолорун хомуска эмиэ дьарыктаабыт. Ону үөрэнээччитэ Эрхан Протопопов хомуһун уоһуттан араарбакка оонньообута бигэргэттэ.
Ити курдук, күн үҥкүүлүүр түһүлгэтин тэрээһинигэр, оскуолаларын ыһыаҕар аналлаах өрөгөйдөөх күҥҥэ бэлэмнэнэн, оһуохайы оройуттан туппут 5 «Б» кылаастар уруоктара сырдык санааҕа, истиҥ-иһирэх эйгэҕэ түмүктэннэ. Төрөөбүт тылгытынан кэпсэтиҥ, ааҕыҥ, айыҥ-тутуҥ, күндү оҕолор! Барҕа махтал!
Августина Владимирова-Хабарова.
Хаартыскаларга ааптар түһэриитэ
Хотугу Муустаах муора кытыла барыта хаарбах тимиринэн, уматык буочукаларынан, быраҕыллыбыт бөҕүнэн туола сытар диэн Арктика…
Халыма-Индигиир биир мандааттаах быыбардыыр уокурукка норуодунай дьокутаат быыбарыгар билиҥҥитэ 9,35% быыбардааччы кытынна. Аллайыаха, Аллараа Халыма,…
М.К.Аммосов аатынан Хотугулуу-Илиҥҥи федеральнай университекка үөрэххэ туттарсыы сүрүн хампаанньата бүттэ. Ааспыт нэдиэлэтээҕи туругунан, барыта 5000-тан…
Аныгы үйэ буолан, кэлиҥҥи кэмҥэ социальнай ситимнэри аны блогер оҕолор “ылан” кэбистилэр. Ол эрэ буолуо…
Бүгүн, балаҕан ыйын 8 күнүгэр, Саха сиригэр 8 чаастан Арассыыйа Өрөгөйүн ырыатынан куоластааһын ыытыллар 176…
Төрөөбүт күҥҥүнэн, Дьокуускай! Дьокуускай -- биһиги өрөспүүбүлүкэбит тэбэр сүрэҕэ, манна устуоруйа уонна аныгы кэм, үгэстэр…