Ийэ уонна оҕо харыстабылын бырайыага олоххо салгыы киллэриллэр

Саха Өрөспүүбүлүкэтигэр “Дьиэ кэргэн” национальнай бырайыак чэрчитинэн дьахталларга консультация ситимэ өссө кэҥиир. “Дьиэ кэргэн” национальнай бырайыакка киирэр “Ийэ уонна оҕо харыстабыла” эрэгийиэннээҕи бырайыак  сыалынан-соругунан ийэ буолуохтаах төрөппүттэргэ, оҕо күүтэр дьахталларга уонна кырачааннарга  мэдиссиинэ көмөтүн хаачыстыбатын уонна табыгастаах буолуутун үрдэтии буолар.

Бу сыл бырайыак чэрчитинэн  мэдиссиинэ тэрилтэлэригэр, тыа сиригэр, куорат тииптээх бөһүөлэктэргэ уонна кыра куораттарга дьахталлар консультацияларын  тэрийии көрүллэр. Бырайыагы олоххо киллэрии саҕаланарыгар Алдан уонна Хаҥалас Оройуоннааҕы киин балыыһаларын акушер-гинеколог кэбиниэттэрин базатыгар   дьахталларга консультация ситимин арыйыы торумнаммыта. Ол гынан баран, үбү көдьүүстээхтик  туһаныы түмүгэр уонна Арассыыйа  Доруобуйатын харыстабылын министиэристибэтин өйөбүлүнэн дьахталларга консультация ситимин ахсаана эбилиннэ. Ол курдук, 2025 сыл от ыйыгар Ньурба Оройуоннааҕы киин балыыһатын базатыгар үһүс ситими арыйарга эбии сөбүлэһии түһэрсилиннэ.

Дьахталларга консультация саҥа ситимнэрэ аныгы тэриллэринэн сэбилэниэхтэрэ.

-“Дьиэ кэргэн” национальнай бырайыак чэрчитинэн дьахталларга консультация ситимнэрин кэҥэтии – эрэгийиэҥҥэ, чуолаан ыраах сытар нэһилиэнньэлээх пууннарга, дьахталлар  олохторун хаачыстыбатын тупсарарга уонна мэдиссиинэ көмөтө табыгастаах буоларыгар дьоһун суолталаах хардыы, — диэтэ Саха сирин доруобуйа харыстабылыгар миниистирэ Лена Афанасьева.