«Ийэ-урбаанньыт» үөрэтэр бырагыраама кыайыылааҕа — Сардаана Хон

Саха сиригэр сэттис төгүлүн ыытыллар «Ийэ-урбаанньыт» федеральнай бырагыраама эрэгийиэннээҕи түһүмэҕэ түмүктэннэ.

Урбаан, эргиэн уонна туризм министиэристибэтин көмөтүнэн тэрийээччинэн «Мин биисинэһим» киин буолла. Быйылгы кыайыылааҕынан Дьокуускайтан Сардаана Хон буолары ситистэ.

Биэс күн устата Саха сирин улуустарыттан уонна Дьокуускай куораттан 30 кыттааччы  үөрэх кууруһун ааста. Дьахталлар бэйэлэрин биисинэстэрин саҕалыырга наадалаах билиини-көрүүнү ыллылар: биисинэс көрүҥүн талартан саҕалаан, үп-харчы моделын оҥорууга уонна бэлэм бырайыагы эспиэртэр иннилэригэр көмүскээһиҥҥэ тиийэ. Урбааны сайыннарар инфраструктура бэрэстэбиитэллэрэ саҥа саҕалыыр урбаанньыттарга судаарыстыба өйөбүлүн миэрэлэрин туһунан кэпсээтилэр. Ону таһынан, Дьокуускай куорат ситиһиилээх дьахтар-урбаанньыттарын кытта көрсүһүүлэр уонна кинилэр хампаанньаларыгар дьыалабыай сырыылар тэрилиннилэр.

Ийэлэр «Bon ami» французскай бэкээринэ тэрийээччитэ Наталья Решетнягы, «Пространство» айар платформа дириэктэрэ Алина Алексееваны, «Jejen» кондитерскай тэрийээччитэ Мария Столярчигы, «Дойдум аhа» хампаанньа дириэктэрэ Саргылаана Григорьеваны, «Таптал» дьиэ кэргэн кондитерскай тэрийээччитэ Любовь Артемьеваны, «Красный чемодан» турфирма бас билээччитэ Екатерина Кириллинаны уонна көдьүүстээх кэпсэтиигэ эспиэрАнна Фоминаны кытта кэпсэтииттэн кынаттаннылар.

Эспиэр хамыыһыйатын иннигэр массыынанан оһуор-бичик тигэр устуудьуйа, оҕо кииннэрэ, логопед кабинеттара, туой оҥоһук мастарыскыайа, кондитерскай сыах, полиграфия сулууспата, таҥас сууйар тэрилтэ, тирии галантереятын оҥорон таһаарыы, документальнай киинэлэри устуу курдук уонна да атын бырайыактар көмүскэннилэр.

«Саамай сүрүнэ диэн эһиги манна саҥа билсиһиилэри, билиини-көрүүнү уонна олоххутугар үйэ-саас тухары хаалар билиилэри ыллыгыт. Ол көмөтүнэн эһиги кэнэҕэски ситиһиилээх урбаанньыт быһыытынан бэйэҕитин булунуоххут», – диэн Урбаан, эргиэн уонна туризм миниистирэ Георгий Андреев бэлиэтээтэ.