Ийэ үүтүнэн аһатыы нэдиэлэтэ ыытыллар

Атырдьах ыйын 4 күнүттэн 10 күнүгэр диэри өрөспүүбүлүкэҕэ Ийэ үүтүнэн аһатыы нэдиэлэтэ ыытылла турар. 

Аан дойду үрдүнэн үгүс дойдуларга ийэ үүтүнэн аһатыы нэдиэлэтэ сыл аайы бэлиэтэнэр. Оҕолор доруобуйаларыгар уонна чэгиэн буолууларыгар айылҕаттан анаммыт ураты аһылык суолтатын тоһоҕолоон бэлиэтииллэр. Бу хамсааһын ийэ үүтүн туһатын туһунан дьоҥҥо-сэргэҕэ тиэрдиигэ уонна ийэ үүтүнэн аһатарга быһаарыммыт дьахталлары өйөөһүҥҥэ туһуланар.

Ийэ үүтүнэн аһатыы туһата:

Ийэ үүтүгэр оҕо үчүгэйдик  улаатарыгар, сайдарыгар наадалаах «антитела», битэмииннэр уонна минераллар бааллар. Оҕо иммунитетын бөҕөргөтөргө көмөлөһөр, инникитин аллергия, диабет уонна уойуу үөскүүр кутталын намтатар. Маны тэҥэ, ийэ уонна оҕо икки ардыларыгар ураты истиҥ сыһыаны олохтуурга, тапталы күүһүрдэргэ көмөлөһөр.

Ийэҕэ уонна оҕоҕо туһалаах буоларын туһугар, маннык быраабылалары тутуһарга сүбэлииллэр:

— оҕону төрөөтүн кытта тута эмиийгэ сытыарыҥ;

— сөптөөх аһатыы эрэсиимин тутуһуҥ;

— бороһуок үүтү, эбэтэр ынах үүтүн эрдэ киллэрииттэн туттунуҥ;

— педиатры кытта куруук сүбэлэһиҥ.

Ийэ үүтүнэн аһатары көҕүлээһин нэдиэлэтэ ийэ үүтүн суолтатын тоһоҕолоон бэлиэтиир уонна баҕалаах дьоҥҥо барыларыгар табыгастаах усулуобуйаны тэрийэргэ аналлаах.

Сиһилии аах: https://mintrud.sakha.gov.ru/news/9346