Ийэбэр сүгүрүйэ аныыбын

Сэтинньи 23 күнүгэр Өксөкүлээх Өлөксөй  аатынан норуоттар доҕордоһууларын киинигэр «Сайсары» дьахталлар вокальнай ансамбылларын айар киэһэтэ буолла.

14 мааны Далбардары сценаҕа таһааран чиэстээтилэр. Кинилэр иэйиилээх кэнсиэрдэрин астына көрдүбүт. Ыраас уу курдук кылыгырас куоластарыттан сахабыт маанылаах айылҕатынан арчыламмыт курдук буоллубут. Бу үтүө дьоро күнтэн мин биир дойдулааҕым Татьяна Софроновна Софроноваҕа хараҕым хатанна. Татьяна Софроновнанан киэн туттуум күүһүрдэ. Кинини биһиги биир дойдулаахтара медик уонна Сунтаарга «Көлүкэчээн» ансаамбыл кыттыылааҕын курдук билэрим. Татьяна Софроновна уус ийэтин, мындыр эмчитин утумнаан, алмаас тааһа кырыыламмытын курдук олус элбэх дьарыктаах. Дьоҕурдаах, мындыр эмчит, алгысчыт быһыытынан сыаналанар.

Өссө ийэтиттэн биир утума иистэнньэҥ. «Сайсары» ансаамбылын үөрүүлээх күнүгэр Татьяна Софроновнаҕа республикатааҕы норуот маастара үрдүк аат иҥэриллибитин туттардылар. Татьяна Софроновна бу бочуоттаах ааты ийэм сырдык кэриэһигэр аныыбын диэн,санаатын үллэһиннэ.

Марта Николаева