«Ийээ, өллөхпүнэ ытаамаар…»  быыстапка аһылынна

Чурапчыга Е.А. Борисов аатынан киин библиотекаҕа РФ  Суруналыыстарын сойууһун чилиэнэ, биир дойдулаахтара Светлана Владимировна  Диодорова-Лаврентьева   тапталлаах уола, Чурапчы киэн туттар ыччата, гвардия младшай сержана, байыаннай миэдик,  байыаннай дьайыыга олоҕун толук уурбут  Владимир Диодоров-Лаврентьев-Боб сырдык кэриэһигэр «Ийээ, өллөхпүнэ ытаамаар…»  быыстапка аһылынна.

Быыстапкаҕа  олохтоохтор, эдэр ыччат, оскуола үөрэнээччиллэрэ   муһуннулар. «Светлана Владимировна   оҕотун туһунан истиҥник-иһирэхтик  кыра  сааһыттан  саҕалаан, ыччат кэмин, анал байыаннай дьайыыга бойобуой сырыыларын туһунан, олорбут кылгас, чаҕылхай олоҕун сырдатта. Мустубут дьоҥҥо   Вова  олорбут олоҕо хаартысканан,  видеороликтарынан көрдөрүллэн  дьон өйүгэр-сүрэҕэр  дириҥ  өйдөбүлү хаалларда. Быыстапкаҕа  анал байыаннай дьайыыга  Вова кэтэ сылдьыбыт таҥаһа, тутта сылдьыбыт  маллара,  бойобуой наҕараадалара, дьонугар суруйбут суруктара, хаартыскалара, трофейдара туруоруллубуттарын ийэтэ дьоҥҥо сиһилии кэпсээн билиһиннэрдэ», — диэн Киин библиотека иһитиннэрдэ.

Тэрээһин кэмигэр  элбэх киһи  санаатын үллэһиннэ,  билиҥҥи кэмҥэ  маннык быыстапка  Ийэ дойдуну таптыырга, бэриниилээх буоларга үтүө холобур  бэлиэтээтилэр.