“Ийэҕэ махтал!” туһалаах куонкурус

Кэбээйи улууһугар Патриотизм, Улуу Кыайыы 80 сылын чэрчилэринэн кулун тутар 7 күнүгэр Тыайа нэһилиэгэр  үлэ, сэрии бэтэрээнэ Полятинская Аксинья Васильевна 90 сааһыгар аналлаах «Ийэҕэ махтал!» диэн аһаҕас тэрээһин ыытылынна.

Тэрээһини оҕолоро, чугас аймахтара иилээн-саҕалаан ыыттылар, иис күрэхтэһиитэ, маастар-кылаас буолла.

Курэхтэһиигэ барыта 8 иистэнньэҥ кытынна: үс киһи Кэбээйиттэн, Куокуйтан икки, Тыайаттан эмиэ үс киһи. Куонкурус кыттыылаахтара эрдэттэн быьыллыбыт флис ичигэс матырыйаалтан толстовкалаах ыстаан кэмпилиэгин болдьоммут бириэмэ иһинэн тигиигэ күрэхтэстилэр. Дьүүллүүр сүбэҕэ Аксинья Васильевна оҕолоро, анаан кэлбит ыалдьыттар — Чурапчы улууһун норуотун маастара, «Кыайыы ымыыта» бырайыак ааптара, Мугудай нэһилиэгин «Сайдыына» дьахталлар сэбиэттэрин бэрэссэдээтэлэ Захарова Е.Е., РФ иитиигэ уонна үөрэхтээһиҥҥэ бочуоттаах үлэһитэ, физкультура учуутала, Мугудай нэһилиэгин дьахталларын сэбиэтин чилиэнэ Полятинская С.Д. уонна РФ доруобуйа харыстабылын туйгуна, үлэ бэтэрээнэ, Намнааҕы киин балыыһа үлэһитэ Тихонова Л.К. үлэлээтилэр, бары киритиэрийи тутуһан иистэнньэҥнэр тигиилэрин сыаналаатылар. Кинилэр куонкурус кыттыылаахтара иискэ дьаныардарын,  туттууларын-хаптыыларын, хаачыстыбаларын, хас биирдии дьахтар туспа суоллааҕын-иистээҕин бэлиэтээтилэр.

Онон куонкурус түмүгүнэн, Муҥутуур кыайыылааҕынан Дьяконова К.А. (Кэбээйи) таҕыста. 1 миэстэни Дьячковская Т.О. (Кэбээйи), 2 миэстэни Игнатьева Р.П. (Куокуй) ыллылар, 3 миэстэҕэ Левина Е.Ф. таҕыста. Итини таһынан анал ааттар ананан, барыларыгар сыаналаах бириистэр туттарылыннылар. Кыттааччылар тэрийбит дьоҥҥо, дьүүллүүр сүбэ чилиэттэригэр, спонсордарга дириҥ махталларын тиэртилэр. Кэмпилиэк таҥастары байыаннай дьайыыга сылдьар уолаттарбытыгар ыытыллыахтара.

Куокуйтан «Надежда» түмсүү кыргыттара тиийэн кыттан, ханнык таһымҥа сылдьалларын билэн, атын иистэнньэҥнэр үлэлэрин сэргээн көрөн кэллилэр. Бу куонкуруска иитээччи Р.П. Игнатьеваны иккис миэстэни ылбытынан, биэнсийэлээх Т.У. Еремееваҕа «Кыһамньылаах» анал аат анаммытынан эҕэрдэлиибит!  Түмсүүбүт аатыттан Тыайа олохтооҕо Полятинская А.В. аатын үйэтитэр Аксинья Васильевна ыччаттарыгар, аймахтарыгар барҕа махталбытын тиэрдэбит, хайгыыбыт, өйүүбүт уонна Тыайа олохтоохторугар бу курдук өрүү түмсүүлээх буолалларыгар баҕарабыт.

Ираида Софронеева, Куокуй, Кэбээйи.