Ийэҕэ таптал

Итинник ааттаах быыстапка Дьокуускайга А.Е.Кулаковскай-Өксөкүлээх Өлөксөй аатынан норуоттар доҕордоһууларын дьиэтигэр Саха сиригэр Ийэ күнүн көрсө национальнай бибилэтиэкэ көмөтүнэн тэрилиннэ.

Манна үбүлүөйдээх бэйиэттэр хоһооннорун ааҕыахха, П.П.Романов аатынан ойуулуур-дьүһүннүүн училище (кэллиэс), Л.А.Ким аатынан уруһуй оскуолатын үөрэнээччилэрин үлэлэрин көрүөххэ сөп. Бырайыак ааптара — Александра Старостина, норуоттар доҕордоһууларын дьиэтин Ресурснай үөрэтэр-методологическай киин сүрүн методиһа.

Быыстапканы арыйыы үөрүүлээх тэрээһинигэр мустубут ыалдьыттары А.Е.Кулаковскай аатынан норуоттар доҕордоһууларын дьиэтин генеральнай дириэктэрэ Антонида Корякина эҕэрдэлээтэ. «Колымчанка» этно-фольклорнай ансаамбыл салайааччыта Татьяна Бандерова, А.Н. уонна Н.К.Чиряевтар ааттарынан национальнай гимназия 3 «Б» кылааһын үөрэнээччитэ София Борисова тэрэһини ситэрэн-хоторон, киэргэтэн биэрдилэр.

Быйыд Александр Пушкин, Токтогул Сатылганов, Серафим Кулачиков – Эллэй, Булат Окуджава, Николай Туприн – Кэһиилээх Уола, Николай Курилов, Наталья Михалёва – Сайа үбүлүөйдээх бэлиэ сыллара. Быыстапкаҕа саамай күндү киһиэхэ — ийэҕэ анаммыт хоһоонноро туруорулуннулар. Дууһа кылын таарыйар айымньылары болҕомтону тардар бэртээхэй хартыыналар киэргэтэллэр.

Анна Супсукова, Л.А.Ким аатынан оҕолору уруһуйдуурга үөрэтэр оскуола преподавателэ:

—Быыстапкаҕа 9-15 саастаах оҕолор үлэлэрэ туруорулуннулар. Сүрүннээн натюрморт, хотугу тиэмэҕэ хартыыналар эмиэ бааллар. Оҕолор наһаа кыһанан, ис сүрэхтэриттэн уруһуйдаабыт хартыыналара. Чаҕылхайдар, нарыннар, сырдыктар, санааны көтөҕөллөр.

Антонина Шадрина, бу оскуола преподавателэ:

— Олус үчүгэй аныгы үйэ ирдэбилигэр эппиэттиир быыстапка. Болҕомтону тардар. Киһи ис дууһатын таарыйар.

Станислав Захаров, П.П.Романов аатынан ойуулуур-дьүһүннүүр училище (кэллиэс) преподавателэ:

— Лиана Нучеканова «Детские сны» (триптих) үлэтэ баар. Кини оҕотун уруһуйдаата.  Жаклена Месропян «Армянская свадьба» хартыынатыгар норуот үгэһэ көстөр, кэпсэнэр. Валентина Новгородова «Солнечный цветок глазами детей» — оҕоҕо, айылҕаҕа, сибэккигэ таптал көстөр. Кира Шишигина «Ипподром в Бөтүгүттэ» диэн үлэтигэр төрөөбүт тапталлаах Чурапчытын көрөбүт. Сандаара Иванова «Хаптаҕас» диэн хартыынатыгар дьиэ кэргэн сир аһын хомуйар. Бу хартыынаны көрөөт, кэрэ, сырдык санаа кууһар.

Дьокуускай куорат олохтоохторун, ыалдьыттарын быыстапкаҕа ыҥырабыт. Кэлэн көрүҥ-истиҥ, астына, дуоһуйа сынньаныҥ.

А.Е.Кулаковскай аатынан норуоттар доҕордоһууларын дьиэтин пресс-сулууспата

Айталина Аргунова хаартыскаларга түһэриитэ