Ийэҕэ анаммыт сибэкки дьөрбөтө

Дьокуускайга А.Е.Кулаковскай аатынан норуоттар доҕордоһууларын дьиэтигэр ийэлэргэ аналлаах «С любовью о маме» быыстапка дьон-сэргэ болҕомтотун тардар.

Манна Былатыан Ойуунускай, Расул Гамзатов, Эдуард Асадов, Улуро Адо, Баал Хабырыыс, Евдокия Бокова күн күбэй ийэлэригэр анаабыт истиҥ хоһооннорун быыстапканы көрө кэлбит ыалдьыттар долгуйа ааҕаллар диэн тустаах тэрилтэ пресс-сулууспата иһитиннэрэр.  Маны сэргэ, Дьокуускайдааҕы оҕо киинин иитиллээччилэрэ «Ийэбэр сибэкки» диэн тиэмэҕэ үлэлэрин үөрэ, сөҕө, хайгыы көрдүлэр. Тапталынан, ытыктабылынан оҥоһуллубут экспозициялар кэрэхсэбили ылыахтарын ылаллар.

Быыстапканы көрүөхтэрин баҕалаахтары  А.Е.Кулаковскай аатынан норуоттар доҕордоһууларын дьиэтигэр  күүтэллэр.

Норуоттар доҕордоһууларын дьиэтин кэлэктиибэ быыстапканы тэрийсибит оҕо киинин уонна Национальнай бибилэтиэкэ үлэһиттэригэр махтанар.

Айталина Аргунова хаартыскаларга түһэриитэ.