Сэтинньи 27 күнүгэр Арассыыйаҕа Ийэ күнэ бэлиэтэнэр. Бу күнү көрсө Ил Дархан Айсен Николаев элбэх оҕолоох ийэлэргэ судаарыстыбаннай наҕараадалары туттарда.
— Ийэ буолуу – үрдүк чиэс эрэ буолбатах, бу – улахан эппиэтинэс, сыралаах үлэ. Дьиэ кэргэн туруктаах буоларыттан уопсастыба, дойду туруга эмиэ тутулуктаах. Онон дьиэ кэргэҥҥэ судаарыстыбаннай көмө оҥоһуллара суолталаах. Саха сиригэр дьиэ кэргэн бэлиитикэтэ үрдүк таһымнаах. Биһиги норуоппут историята биир киһиттэн – Ийэттэн силис тардар. Ийэни туох да солбуйбат. Дьахтар доруобуйатын харыстааһын биһиги биир уталытыллыбат сорукпут. Сылтан сыл элбэх оҕолоох дьиэ кэргэттэр ахсааннара эбиллэн иһэринэн киэн туттабыт. Өрөспүүбүлүкэҕэ 33 тыһыынчаттан тахса элбэх оҕолоох дьиэ кэргэттэр бааллар, кинилэртэн 2 тыһыынчаттан тахса ыал биэстэн элбэх оҕолоохтор. Быйыл хат дьахталларга, эмтэрэр ийэлэргэ кэккэ тэрээһиннэр ыытылыннылар. Ийэ сылыгар 10 ый устата 9558 оҕо төрөөтө. 7507 оҕоҕо “100 сыл оҕолоро” хапытаалы ыллылар, — диэн кини эттэ.
“Ийэҕэ үрдүк махтал” бэлиэнэн Дьааҥы улууһугар олорор Людмила Слепцова наҕараадаланна. Кини 6 оҕону төрөппүт уонна 12 оҕону иитэ ылбыт. 10 оҕото оскуолаҕа үөрэнэр, улахаттара үлэлииллэр, аармыйаҕа сулууспалыыллар. Слепцовтар үс сиэннээхтэр.
Сунтаар улууһун Кэмпэндээйититтэн сылдьар 10 оҕолоох Афанасия Конобулова Ил Дархан илиититтэн “Дьоруой Ийэ” бэлиэтин, уордьанын тутта. Бу эдэркээн ийэ уон биирис оҕотун сүрэҕин анныгар илдьэ сылдьар эбит. Кини ийэлэр ааттарыттан үрдүк наҕараадатыгар махтанан тыл эттэ. Мантан да атын ийэлэр «Ийэ албан аата» мэтээлинэн, бырабыыталыстыба, Ил Дархан Бочуотунай грамоталарынан наҕараадаланнылар.
Ийэ сылыгар дьиэ кэргэҥҥэ, оҕо аймахха, ийэ буолууга аналлаах элбэх тэрээһин ыытылынна. Сокуон да өттүгэр элбэх уларыйыылар буоллулар. Холобур, 5-тэн элбэх оҕолоох ыалларга дьиэ-уот нолуогуттан босхолоноллорун туһунан сокуон тахсыбыта.
Хаартыска: Андрей Сорокин, СИА.
Өрөспүүбүлүкэ борокуруора Сергей Дябкин СӨ Бэтэринээрийэ департаменын урукку салайааччытыгар тэриллибит холуобунай дьыаланан буруйдуур түмүгү бигэргэттэ.…
Ааспыт өрөбүл күннэргэ Дьокуускайга эчэйиитэ суох 15 суол быһылаана бэлиэтэннэ. Бу туһунан киин куорат ГАИ…
2025 сылга араас таһымнаах быыбардарга байыаннай дьайыы 890 кыттыылааҕа мандааттаах туппут. Бу туһунан «Биир ньыгыл…
Бүгүн, ахсынньы 16 күнүгэр, Дьокуускайга 1–8-с кылаас үөрэнээччилэригэр актированнай күн биллэрилиннэ. Бу туһунан киин куорат…
Cаха сирин синоптиктарын билгэлэринэн бүгүн, ахсынньы 16 күнүгэр, хоту оройуоннарынан хаардыыр. Эдьигээн улууһугар сөкүүндэҕэ 9-14…
Бүгүн Дьокуускайга «Патриот» ыччат киинин үөрүүлээх аһыллыыта буолан ааста. Бу аныгы кэм ыччатын сайдар, үүнэр,…