Икки дьахтартан харчы уорбут

Ньурбаҕа полиция отделын дьуһуурунай чааһыгар олохтоох дьахталлартан икки сайабылыанньа киирбит.  Полицейскайдар быһаарсан билбиттэрэ, бу икки түбэлтэҕэ биир киһи сыһыаннаах эбит. 

Суһал-ирдиир үлэ кэмигэр полиция үлэһиттэрэ уорбаланааччыны — урут уорууга сууттана сылдьыбыт  38 саастаах олохтоох киһини туппуттар.

Бастакы түгэн. Эр киһи билэр дьонун кытары арыгылаабыт. Сайабылыанньалаах дьахтар уорбаланааччыттан төлөпүөнүн разблокировкалыырга көрдөспүт. Ол кэннэ дьахтар ол туһунан умнан кэбиспит, эр киһи дьахтар төлөпүөнүттэн сим-каартаны  уорбут.  Сим-каартаҕа дьахтар  баанын каартата баар  эбит.  Эмсэҕэлээччи  каартатыттан харчыны устубуттарын кэннэ биирдэ  полицияҕа сайабылыанньа суруйбут. Уопсайа 25 000  солк. хоромньу тахсыбыт.

Иккис түгэн. Уорбаланааччыга билэр дьахтара харчытын уурдарар сыаллаах мобильнай баанынан ыыппыт.  Кэлин быһаарсан билбиттэрэ, дьахтар арыгы иһэр былааннаах эбит, онон харчытын барытын туттумаары  билэр киһитигэр ыыппыт.  Ол эрээри эр киһи дьахтар көрдөһүүтүн толорботох. Инньэ гынан  22 000 солк. хоромньу тахсыбыт. Эр киһи харчыны аска-үөлгэ уонна арыгыга бараабыт.

Билигин эр киһиэхэ РФ Холуобунай кодексын 158 ыст. 3 ч. («Кража») уонна 160 ыст. 2 ч.  («Присвоение или растрата») холуобунай дьыалалар көбүтүлүннүлэр.