Икки мөлүйүөн түөкүттэргэ ыытыллыбыт!

Бу туһунан СӨ ИДьМ саайтыгар суруллар. Ол курдук Дьокуускай олохтоохторо түөкүттэр угаайыларыгар киирэн биэрэннэр, икки мөл. солк. харчыларыттан мэлийбиттэр. 

Дьокуускайга 2 №-дээх полиция отделын дьуһуурунай чааһыгар 74 саастаах дьахтар үҥсүү суруйан киллэрбит. Киниэхэ, арай туран,  «Telegram» нөҥүө урут үлэлээбит оскуолатын дириэктэриттэн иһитиннэрии кэлбит. Онно быраабы араҥаччылыыр уорганнар былааны таһынан бэрэбиэркэ оҥорон эрэллэрин туһунан этиллибит. Биллэн турар, салгыы «ФСБ үлэһитэ» төлөпүөннээбит. Бу киһи оскуола сорох үлэһиттэрин, ол иһигэр урут үлэлээбиттэри киллэрэн туран, тас дойдуга харчы ыытыыга уорбалааһын баарын, онно кини аата баарын иһитиннэрбит. Эмсэҕэлээччи итэҕэйэн төлөпүөннээччилэр ыйыыларын-кэрдиилэрин толорон барбыт. Ол түмүгэр, харчытын счетуттан устан, 581 тыһ.солк. түөкүттэр счеттарыгар ыыппыт.

Итинник курдук балаһыанньаҕа уһуйаан үлэһитэ киирэн биэрбит. Түөкүттэр төлөпүөннээн, эмиэ ФСБ үлэһиттэрэ аатырбыттар. Улахан кирэдьиити ыларыгар уонна ууруммут харчытын кытары бүтүннүүтүн кинилэр этэр счеттарыгар ыытарыгар итэҕэппиттэр. Ол түмүгэр, уһуйаан үлэһитэ 800 тыһ. кэриҥэ солк. ыыппыт.

Ити курдук, түөкүттэр өссө икки киһини угаайыларыгар киллэрбиттэр. Марха бөһүөлэгин 85 саастаах олохтооҕор эмиэ билбэт нүөмэриттэн эрийбиттэр. Киниэхэ инвестиционнай хампаанньаттан эрийдибит диэбиттэр уонна харчытын улаатыннарарыгар «сүбэлээбиттэр». Түөкүн саастаах дьоннор хото «инвестор» буолалларын, элбэх харчыланалларын эппит. Оннук кэпсэтии түмүгэр, эмсэҕэлээччи 270  тыһ.солк. мэлийбит.

Оттон Дьокуускай куорат 21  саастаах олохтооҕор түөкүттэр баан үлэһиттэрэбит диэн төлөпүөннээбиттэр. Кинилэр эмсэҕэлээччи тус кабинетыгар саарбах дьон киирэ сатаабыттарын, онон харчытын «куттала суох счекка» көһөрөрө ордугун эппиттэр. Кинилэри итэҕэйэн эдэр киһи кирэдьиитин каартатыттан 370 тыһ.солк. харчыны төлөпүөннээччилэр эппит счеттарыгар ыыппыт.

Болҕойуҥ! СӨ ИДьМ билбэт нүөмэргититтэн төлөпүөннээтэхтэринэ уонна билбэт дьоҥҥутун кытта кэпсэтимэҥ диэн сүбэлиир. Маны таһынан, ыксаамаҥ-ыгылыйымаҥ уонна билбэт саарбах дьоҥҥут төлөпүөнүнэн ыйалларын-кэрдэллэрин толорбутунан барымаҥ диэн сэрэтэллэр. Төлөпүөнүнэн эрийэн кирэдьииттэ ыл диэн ыгар буоллахтарына, кэпсэтимэҥ. Билбэт дьоҥҥут төлөпүөнүнэн тугу этэллэрин истимэҥ диэн этэллэр.

СӨ ИДьМ пресс-сулууспата