Икки нэдиэлэ иһигэр хас даҕаны даачаны халаабыт киһини туттулар

Полицейскайдар Дьокуускай куоракка даачалары халаабыт киһини туттулар. 

Дьокуускай куорат полициятын 3 отделыгар   малларын уордарбыт дьонтон хас да сайабылыанньа киирбит.

Суһал-ирдиир үлэ кэмигэр  урут хаста да сууттана сылдьыбыт  41 саастаах уорбаланааччыны туттулар.

Барыллааһын быһыытынан, икки нэдиэлэ иһигэр эр киһи үс даачаны халаабыт. Түүн дьон дьиэтигэр аанынан уонна түннүгүнэн киирэн, уорбут малын-салын барытын массыынатыгар тиэйэн илдьэр эбит. Ол курдук  водонагреватели, уунан хааччыйыы автоматическай станциятын, 2 электрическэй чаанньыгы, тэлэбиисэри уо.д.а. уорбут. Уопсай хоромньу кээмэйэ 100 тыһ. солк.

Уорбаланааччы уорбут малын ойуурга кистии баран истэҕинэ тутуллубут.

Билигин эр киһиэхэ  РФ Холуобунай кодексын 158 ыст. 2 ч. холуобунай дьыала көбүтүлүннэ.