Икки оҕолоох аҕа Кытайга көтөөрү алименын иэһин төлөөтө

Суут бириистэптэрин куораттааҕы отделынан икки оҕолоох 35 саастаах аҕаттан алименын иэһин тутар туһунан толоруу дьыалата көрүллүбүт. Бу туһунан Саха сиринээҕи Суут бириистэптэрин сулууспатын пресс-сулууспата иһитиннэрэр.

Суут быһаарыытынан, эр киһи ый аайы хас биирдии оҕотугар тиийинэн олоруу алын кээмэйин аҥаарын ыытыахтаах эбит, ол эрээри бу эбээһинэстэрин толорботох. Буруйданааччы көрдөбүлгэ сылдьыбыт уонна алимеҥҥа иэстээхтэр реестригэр киллэриллибит.

Иэстээх эр киһи тутуллубутун кэннэ, массыынаны ыытар бырааба хааччахтаммытын уонна Арассыыйа тас өттүгэр тахсар кыаҕа суоҕун иһитиннэрбиттэр. Эр киһи Кытайга көтөрө былааннаммыт буолан, 300 тыһ. солк. тахса алименын иэһин толору төлөөбүт.