Икки саха спортсмена Германияҕа буулдьанан ытыыга Аан дойду Куубагар кыттар

Германияҕа бүгүн, ыам ыйын 19 күнүгэр, буулдьанан ытыыга Аан дойду Куубага саҕаланар.

Дойду хамаандатын састаабыгар Саха сирин сүүмэрдэммит хамаандатын бэрэстэбиитэллэрэ Алина Готовцева уонна Николай Яковлев кыттарга бэлэмнэнэллэр. Бу туһунан «Триумф» пресс-сулууспата иһитиннэрэр.

Күрэхтэһии юниордарга ыам ыйын 19-25 күннэригэр Зуль куоракка ыытыллар. Быһа барыллаан, күрэххэ аан дойду 500-тэн тахса снайпера кыттара күүтүллэр.

Алина Готовцева пневматическай бэстилиэтинэн ытыыга, оттон Николай Яковлев пневматическай бинтиэпкэнэн ытыыга кыттыахтара.

Мэтээллэр тус уонна хамаандалар састааптарыгар оонньонуохтара. Бүгүн официальнай эрчиллиилэр буолаллар, оттон ыам ыйын 20 күнүттэн күрэхтэһии официальнайдык саҕаланар.