Икки улуус мировой судьуйаларын бигэргэттилэр

Ил Түмэн 13-с уочараттаах пленарнай мунньаҕар норуот дьокутааттара Таатта уонна Чурапчы улуустарын мировой судьуйаларын дуоһунаһыгар хандьыдааттары көрдүлэр.

Дакылааты Афанасий Владимиров билиһиннэрдэ. Кини иһитиннэриитинэн, бу боппуруос ыам ыйын 29 күнүгэр сис кэмитиэт мунньаҕар көрүллүбүт.

Кистэлэҥ куоластааһын түмүгүнэн Таатта улууһун 29 №- дээх суут учаастагын мировой судьуйатынан үс сыллаах болдьоххо Варвара Петрова талылынна. Петрова Варвара Алексеевна Ураллааҕы судаарыстыбаннай юридическай академияны «Юриспруденция» идэтин бүтэрэн, Хаҥалас улууһун 34 №-дээх суут учаастагын мировой судьуйатын көмөлөһөөччүтүнэн ананан үлэлиир.

Оттон Чурапчы улууһун 35 №-дээх суут учаастагын мировой судьуйатын дуоһунаһыгар Максим Коркин талылынна. Кини М.К. Аммосов аатынан ХИФУ «Юриспруденция» идэтин бүтэрэн, киин куорат суутун судьуйатын көмөлөһөөччүтүнэн үлэлиир.

Мировой судьуйа дуоһунаһыгар талыллыбыт Варвара Петрова уонна Максим Коркин бирисээгэ аахтылар. Парламент аатыттан спикер Алексей Еремеев талыллыбыт мировой судьуйалары эҕэрдэлээтэ уонна ситиһиилээх үлэни баҕарда.