Иккиһин итирик туруктаах уруулга олорбут дьахтар сууттанна

Суут быһаарбытынан, 41 саастаах сууттанааччы дьахтар урут итирик туруктаах массыына ыыппытын иһин административнай эппиэккэ тардылла сылдьан, 2025 сыл атырдьах ыйыгар «Honda Fit» мааркалаах массыына уруулугар иккиһин итирик туруктаах олорбут.

Судаарыстыбаннай буруйдааччы санаатын учуоттаан, дьахтар РФ Холуобунай кодексатын 264.1 ыстатыйатын 1-кы чааһынан буруйданан, 180 чаас булгуччулаах үлэҕэ ананан, массыына ыытар бырааба 2 сылга быһыллынна.

Сууттаммыт дьахтартан «Honda Fit» мааркалаах массыыната судаарыстыба туһатыгар былдьанна. Суут уурааҕа сокуоннай күүһүгэр киирэ илик диэн СӨ Борокуратуурата иһитиннэрэр.