Икки омук гражданнара наркотигы сокуоннайа суох эргиниигэ уорбаланаллар

Саха сиринээҕи ИДьМ сулууспатын Нерюнгри оройуонун наркотигы эргиниигэ хонтуруоллуур отделын үлэһиттэрэ суһал иһитиннэриилэринэн, Алдан–Нерюнгри суол трассатыгар наркотигы сокуоннайа суох эргиниигэ чугастааҕы тас дойдулартан икки омук гражданнара уорбаланан тутулуннулар.

Тырааныспары көрүү-истии кэмигэр кэлии дьонтон, 40-ча саастаах эр киһиттэн уонна 34 саастаах дьахтартан, биллибэт сырдык өҥнөөх кристаламмыт эттиктээх 96 сууламмыт бакыаты булан былдьаабыттар. Кэлин кинилэр ыйыыларынан тыаҕа кистэммит өссө эбии 12 бакыаты булбуттар.

Силиэстийэ быһаарыытынан, уорбаланааччылар наркотигы атын эрэгийиэнтэн атыыласпыттар уонна салгыы атыылыыр сыаллаах айаннаан иһэн кыра бакыаттарга уган суулаабыттар. Ыытыллыбыт чинчийии түмүгүнэн синтетическэй мефедрон наркотик буолара быһаарыллыбыт. Холуобунай дьыала тэрилиннэ, уорбаланааччылары хаайдылар. Бу туһунан Саха сиринээҕи ИДьМ пресс-сулууспата суруйар.