“Иккис миэстэ буоллубут”

Аҕыйах хонуктааҕыта СӨ Тыатын хаһаайыстыбатын уонна аска-үөлгэ бэлиитикэтин министиэристибэтин тэрийиитинэн (миниистир А.Александров) “Сылгыһыт күнэ” өрөспүүбүлүкэтээҕи тэрээһин олус сэргэхтик ааста.

Мэҥэ Хаҥалас улууһугар ыытыллыбыт өрөспүүбүлүкэтээҕи тэрээһини тэрийиигэ улуус дьоно-сэргэтэ баһылыктарын Дмитрий Тихонов салалтатынан көхтөөхтүк кытыннылар. “Сылгыһыт күнүн” чэрчитинэн ыытыллыбыт “Сылгыһыт күрэҕэр” үгүс киһи ыраахтан-чугастан көрө кэлбитэ. Уопсайа 13 улуустан 19 хамаанда кытынна.

— “Сылгыһыт күрэҕэр” биһиги 1 Наахара нэһилиэгин Тиэлиги сэл. сылгыһыттара  эрдэттэн бэлэмнэнэн кыттыбыппыт үтүө түмүктээх буолла. Ол курдук, баара-суоҕа 0,15 суотайынан эрэ быысаһан, иккис миэстэҕэ таҕыстыбыт. УАЗ-фермер массыына хаһаайына  буоллубут. Онон үөрүү-көтүү бөҕөбүт.

Гаврил Михайлович Федоровка хамаандабыт аатыттан махтанабыт. Кини атынан кытынныбыт, — диэтэ Тиэлиги тыа хаһаайыстыбатын исписэлииһэ Владимир Алексеев “Саха сирэ” хаһыат саайтыгар анаан.

Таарыйа аҕыннахха, Тиэлиги оскоулатын үөрэнээччитэ Артур Петров бу кыайыыга көмөтө олус суолталаах. Киниэхэ олохтоох оскуола үөрүүлээх быһыыга-майгыга эмиэ бэйэтин бирииһин туттарбыта.

Хаартыска: 1 Наахара нэһ.  тиксэрдилэр уонна Ж.Стрюкова түһэриитэ.