Салгыы
Ил Дархан Аан дойду дьахталларын күнүнэн эҕэрдэлиир

Ил Дархан Аан дойду дьахталларын күнүнэн эҕэрдэлиир

Ааптар:
08.03.2024, 08:47
Хаартыска sakha.gov.ru ылылынна
Бөлөххө киир:

Ытыктабыллаах Саха сирин олохтоохторо!

Саха Өрөспүүбүлүкэтин салалтатын уонна тус бэйэм ааппыттан сааскы сырдык бырааһынньыгынан – Аан дойду дьахталларын күнүнэн эҕэрдэлиибин!

Кулун тутар 8 күнэ күүтүүлээх саас кэлиитин, айылҕа уһуктуутун уонна ону кытта ситимнээх ыра санаалары кэрэһилиир. Сааскы маҥнайгы бырааһынньыкка ис сүрэхтэн этиллэр махтал, ытыктабыл, таптал тылларын күндү ийэлэрбитигэр, кэргэммитигэр, эбээлэрбитигэр, эдьиийдэрбитигэр-балыстарбытыгар, кыыс оҕолорбутугар, кэллиэгэлэрбитигэр аныыбыт.

Үксүгэр буоларын курдук, дьахтар нарын санныгар дьиэ кэргэн түбүктэрэ, үлэтин эбээһинэстэрэ тэҥинэн сүктэриллэр. Эһиги сөҕүмэр ис күүскүт, кытаанах санааны, нарын иэйиини дьүөрэлиир дьоҕургут, үлэҕэ, уопсастыбаннай олоххо үрдүккэ талаһар дьулуургут, ону тэҥэ дьиэҕитин-уоккутун сылаас тыынныыр аналгыт, чугас дьоҥҥутугар кыһамньыгыт иһин истиҥник махтанабын. Дьахтар кута, ураты мындыр толкуйа, үтүө санаата тулалыыр эйгэни кустук өҥүнүү киэркэтэр, уопсастыба сайдыытыгар төһүү буолар, үөрүүнү-көтүүнү, дьолу-соргуну үксэтэр.

2023 сылга өрөспүүбүлүкэ бастыҥ үлэһиттэригэр – үлэҕэ бэриниилэринэн, идэлэригэр тапталларынан үрдүк көрдөрүүлэри ситиспит, араас идэни толору баһылаабыт Татьяна Афанасьеваҕа, Марина Васильеваҕа, Туяра Васильеваҕа, Галина Власоваҕа, Галина Гацулякка, Евдокия Долгуноваҕа, Алиса Егороваҕа, Александра Колодезниковаҕа, Меэта Кюлаотска, Людмила Лугиноваҕа, Ариада Марковаҕа, Прасковья Неустроеваҕа, Оксана Пешковаҕа, Елена Половинкинаҕа, Саргылана Рожинаҕа, Гузель Селиверстоваҕа, Наталья Соломоноваҕа, Кирина Черемкинаҕа, Людмила Черкасоваҕа, Лариса Шепелеваҕа “Үлэ киһитэ” бириэмийэлэри туттарбыппыт. Сылын ахсын бастыҥтан бастыҥнар бу бочуоттаах бириэмийэнэн наҕараадаланыахтара. Кинилэр ортолоругар айылҕаттан талааннаах, мындыр өйдөөх, аһыныгас сүрэхтээх дьахталларбыт баар буолуохтара диэн мин бигэ эрэллээхпин.

Россияҕа Дьиэ кэргэн, Саха сиригэр Оҕо саас сылыгар дьахтар ийэ буолар, иэримэ дьиэни иччилиир аналыгар ураты болҕомтону ууруох тустаахпыт. Оҕоҕо сиэр-майгы өйдөбүлүн, духуобунай сыаннастары иҥэрээччи — ийэ. Россия Федерациятын Президенэ Владимир Путин Федеральнай Мунньахха Анал этиитигэр элбэх оҕолоох ыаллары өйүүр уонна оҕо төрөөһүнүн үксэтэр сыалтан “Дьиэ кэргэн” саҥа национальнай бырайыагы олоххо киллэрэр туһунан биллэрбитэ. Дойду баһылыгын тустаах дьаһалынан өйөбүл дьаһаллара сааһыланыахтара уонна кэҥэтиллиэхтэрэ, оттон элбэх оҕолоох улахан дьиэ кэргэн “судаарыстыба стратегиятын бүттүүнүн” тумус хайысхатынан буолуоҕа. Президент нэһилиэнньэ олоҕор-дьаһаҕар уйгуну түстүүр тутаах соруктары чопчулаабыта. Олор дьадайыы таһымын икки бүк кыччатарга, элбэх оҕолоох дьиэ кэргэни, ийэ буолууну, оҕо сааһы өйүүргэ, уопсастыба доруобуйатын бөҕөргөтөргө туһуланар өрөспүүбүлүкэ дьаһалларын кытта дьүөрэлэһэллэр. Бу барыта Саха сирин бары олохтоохторугар, дьиэ кэргэҥҥэ уонна, биллэн турар, бары дьахталларга саҥа тыыны, санааны, эрэли, эрчими эбиэҕэ!

Дойдуга буолар уларыйыыларга дьахталлар бастакынан хардарар этилэр. Бүгүн эмиэ, анал байыаннай дьайыыга көмөнү оҥорорго дойду бүттүүнэ туруммут кэмигэр, эһиги – Саха сирин дьахталлара волонтердуугут, байыастар дьиэ кэргэннэригэр көмөлөһөҕүт, госпиталларга өйөбүлү оҥороҕут, биир дойдулаахтарбытыгар сылаас таҥаһы, маскировка ситимин тигэҕит, посылкалары, аһы-үөлү ыытаҕыт. Эһиэхэ муҥура суох махтанабыт!

Хас биирдии дьахтар сүгүрүйүүнү уонна тапталы билиэхтээх, бу сааскы сырдык бырааһынньыкка эһиэхэ уонна чугас дьоҥҥутугар эйэни, чэгиэн доруобуйаны, дьолу-соргуну, этэҥҥэ буолууну баҕарабын! Хас биирдии күҥҥүт толору дьоллоох, үгүс үөрүүлээх буолуохтун! Бырааһынньыгынан!

Саха Өрөспүүбүлүкэтин Ил Дархана     А.С. Николаев

+1
2
+1
1
+1
0
+1
0
+1
0
+1
0
+1
0
Бары сонуннар
Салгыы
19 июля
  • 17°C
  • Ощущается: 17°Влажность: 94% Скорость ветра: 1 м/с

Сообщить об опечатке

Текст, который будет отправлен нашим редакторам: