Ил Дархан Аан дойду дьахталларын күнүнэн эҕэрдэтэ

Күндү кэрэ аҥаардарбыт!

Саха Өрөспүү­бүлүкэтин салалтатын уонна тус бэйэм ааппыттан маҥнайгы сааскы бырааһынньыгынан – Аан дойду дьахталларын күнүнэн ис сүрэхпиттэн истиҥник эҕэрдэлиибин!

Саха сирин Далбар хотуттарын дьыалабыай хаачыстыбалара, дьоҕурдара өрөспүүбүлүкэ олоҕун бары эйгэтигэр чаҕылхайдык көстөр. Кырдьыга даҕаны, дьахтар баһылаабатах идэтэ диэн суох! Эһиги туһалаах баайы сиртэн хостооһунтан саҕалаан судаарыстыбаны салайыыга тиийэ сити­һиилээхтик үлэлиигит.

Ону тэҥэ, эһиги мэлдьи истиҥ ийэ, тапталлаах кэргэн, эйэҕэс эбээ, кыһамньылаах эдьиий, балыс уонна нарын кыыс оҕо буолан олохпутун сырдатаҕыт, алаһа дьиэбитин араҥаччылыыгыт, иэримэ дьиэбитин иччилиигит. Аламаҕай сыһыаҥҥытынан, абылыыр кэрэҕитинэн бу Орто дойдуну тапталынан угуттуугут, үтүөнү үксэтэҕит. Биһигинэн киэн туттаргыт туһугар эр дьон ситиһиилээх, күүстээх, бастыҥтан бастыҥ буоларга дьулуһабыт.

Бүгүн эһиэхэ – Арассыыйа Федерациятын көмүскэлигэр туруммут, анал байыаннай дьа­йыыга эйэлээх олох иһин туруулаһа сылдьар байыаннай сулууспалаахтарбыт ийэлэригэр, ойохторугар, эдьиийдэригэр, балыстарыгар, кыргыттарыгар – ураты долгутуулаах күн: ким кэргэнин, ким аҕатын, оҕотун, уба­йын, быраатын, доҕорун, ким таайын, абаҕатын ахтар-саныыр, суохтуур. Бу күннэргэ Саха сирин уонна бүтүн Арассыыйа олохтоохторо эһигини кытта бииргэ чугас дьоммут туһугар долгуйабыт.

Байыаннай сулууспалаахтары уонна кинилэр дьиэ кэргэттэрин өйүүр, кинилэргэ көмөлөһөр Саха сирин волонтердарын хамсааһынын кэрэ аҥаардарыгар махтанабын уонна эҕэрдэлиибин!

Барыгытыгар кытаанах доруобуйаны, баҕа санаа туолуутун, ситиһиилэри уонна дьолу баҕарабын! Таптааҥ уонна тапталлаах буолуҥ!

Аан дойду дьахталларын күнүнэн истиҥ эҕэрдэ!

 

Айсен Николаев,

Саха Өрөспүүбүлүкэтин Ил Дархана.