Ил Дархан Аан дойду төрүт норуоттарын күнүнэн эҕэрдэлээтэ

Саха Өрөспүүбүлкэтин Ил Дархана Айсен Николаев  Аан дойду төрүт норуоттарын  аан дойдутааҕы күнүнэн эҕэрдэлээтэ.

Убаастабыллаах Саха сирин олохтоохторо!

Бүгүн Аан дойду төрүт норуоттарын аан дойдутааҕы күнэ бэлиэтэнэр.

Чуолаан төрүт норуоттар аан дойду араас култууратын уонна тылын илдьэ сылдьааччыларынан буолаллар. Биһиги дойдубут бэрэсидьиэнэ Владимир Владимирович Путин култуура уонна омук арааһа  Арасссыыйа барыны бары кыайар күүһэ буоларын бэлиэтээтэ.

Саха сиригэр төрүт норуоттары өйөөһүҥҥэ улахан үлэ СӨ бастакы бэрэсидьиэнэ Михаил Ефимович Николаев саҕаттан саҕаламмыта. 1990-с сылларга биһиэхэ аҕыйах ахсааннаах төрүт норуоттары көмүскүүр сокуон барылыгар бастакы хардыылар оҥоһуллубуттара. “Саха Өрөспүүбүлүкэтин Хотугу сирин аҕыйах ахсааннаах төрүт норуоттарын көһө сылдьар аҕа уустарын, общиналарын  туһунан” сокуон ылыллыбыта.

Билигин биһиги өрөспүүбүлүкэбитигэр Хотугу сир, Сибиир уонна Уһук Илин аҕыйах ахсааннаах төрүт норуоттарын бэрэстэбиитэллэрин 15-тэн тахса бырыһыана олорор.

1990-с сылларга ылыллыбыт дьаһаллар көмөлөрүнэн, Саха сирин төрүт норуоттара бэйэлэрин төрүт култуураларын, тылларын илдьэ сылдьаллар,  үгэс буолбут дьарыктарын сайыннараллар. Өрөспүүбүлүкэҕэ Хотугу сир аҕыйах ахсааннаах төрүт норуоттарын ассоциацията үлэлиир, Хотугу сир аҕыйах ахсааннаах төрүт норуоттарын кыһалҕаларын быһаарарга, үгэс буолбут олохторун укулаатын, култуураларын уонна төрөөбүт тылларын харыстыырга  улахан болҕомто ууруллар.

Бу күн Саха сирин төрүт норуоттарын култуураларын устуоруйаҕа нэһилиэстибэлэрин харыстааһыҥҥа үлэлиир уонна көмөлөһөр дьоҥҥо махталбын биллэриэхпин баҕарабын.

Барыгытыгар кытаанах доруобуйаны, уһун олоҕу, этэҥҥэ буолууну, эйэни уонна чэчирии  сайдыыны баҕарабын!