Ил Дархан Аҕа дойдуну көмүскээччи күнүнэн эҕэрдэтэ

Саха Өрөспүүбүлүкэтин салалтатын уонна тус бэйэм ааппыттан эһигини Аҕа дойдуну көмүскээччи күнүнэн ис сүрэхпиттэн эҕэрдэлиибин!

Судаарыстыбабыт биир сүдү суолта­лаах бырааһынньыгар биһиги олохторун сулуус­паҕа анаабыт биир дойдулаахтарбытыгар, төрөөбүт дойдуларын халабырдьыттартан көмүскээбит Арассыыйа судаарыстыбатын эрэллээх уолаттарыгар уонна кыргыттарыгар, ону тэҥэ бүгүн дойдубут национальнай интэриэһин туруулаһа сылдьар дьоммутугар ытыктабылбытын биллэрэбит.

Саха сирэ модун санаалаах көмүскээччилэринэн аатырар. Аҕа дойду сэриитин сылларыгар алта уон икки тыһыынчаттан тахса биир дойдулаахпыт ньиэмэс-фашист халабырдьыттарын утары Ийэ дойдубут көмүс­кэлигэр турунан хорсуннук сэриилэспиттэрэ. Сүүрбэ түөрт буойун ССРС Дьоруойун үрдүк аатын сүкпүтэ, өссө биир буойуҥҥа Арассыыйа Дьоруойун аата иҥэриллибитэ. Биһиэхэ эйэлээх халлааны бэлэхтээбит дьоммутун үйэлэр тухары умнуохпут суоҕа.

Кыайыыны ситиспит улуу көлүөнэ удьуор­дара бүгүн байыаннай дьайыы бара турар сиригэр өстөөҕу суоһараллар. Биһиги биир дойдулаахтарбыт Ийэ дойдубутун Украина неонацистарыттан көмүскээн, улуу Держава көҥүлүн уонна суверенитетын туруулаһан аҕаларбыт, эһээлэрбит дьыалаларын салгыыллар. Кинилэр улуу өбүгэлэрин курдук самныбат санаалара, булугас өйдөрө, сатабыллара кэрэхсэтэр.

Ааспыт сылга Саха сирин түөрт олох­тооҕо Арассыыйа Дьоруойун үрдүк аатын сүктэ. «Барс-2» батальон «Боотур» этэрээтин хамандыыра Александр Колесов, ефрейтордар Алексей Неустроев уонна Филипп Евсеев аатырбыт Т-80 «Алеша» тааҥкаларынан ахсааннарынан баһыйар өстөөҕү кытта күөн көрсүһүүлэрэ Аҕа дойдубут устуору­йатыгар киирдэ. Танкистар наҕа­раадаларын Филипп Евсеев эһээтэ Аҕа дойду Улуу сэриитин кэмигэр кыргыспыт сиригэр – Курскай Дугаҕа ылбыттара дириҥ суолта­лаах. Ону тэҥэ, буойун иэһин толоро сылдьан дьоруойдуу охтубут биир дойдулаахпытыгар – Чуумпу акыйаан флотун муора пехотатын туспа гвардейскай биригээдэтин 155-с стрелковай батальонун стрелковай отделениетын ытааччыта Дмитрий Егоровка өлбүтүн кэнниттэн Арассыыйа Дьоруойун аата иҥэриллибитэ.

Байыаннай дьайыы кыттыылаахтарыгар хорсун быһыыларын уонна эр санааларын иһин истиҥ махталбын этэбин. Бу уустук кэмҥэ Дьоруойдарбытынан уонна Арассыыйа көмүскэлигэр туруммут хоо­дуот буойуннарбытынан киэн туттабыт. Кырдьык туһугар хайаан да кыайыахпыт!

Афганистан бэтэрээннэригэр уонна Арассыыйа интэриэһин көмүскээн саа-саадах тутан «итии точкаларга» кыргыспыт уолаттарбытыгар – киэҥник тэнийбэтэх сэриилэр уонна байыаннай иирсээннэр кыттыылаахтарыгар барҕа махталбытын биллэрэбит. Куттал тирээтэҕинэ Ийэ дойду көмүскэлигэр турунарга бэлэм, саппааска сылдьар байыаннай сулууспалаахтарга эмиэ иһирэх эҕэрдэ! Биһиги күүспүт – сомоҕолоһууга, биир санааланыы баарын тухары – күүстээхпит!

Аҕа дойдуну көмүскээччилэрбитигэр – уруй-айхал! Эһиги баар буолаҥҥыт Арассыыйа баар! Эһиги хорсун санааҕыт или-эйэни түстээтин. Тус бэйэҕитигэр уонна дьиэ кэргэҥҥитигэр дьолу, чэгиэн-чэбдик туругу уонна этэҥҥэ буолууну баҕарабын!

 

Айсен Николаев,

Саха Өрөспүүбүлүкэтин

Ил Дархана.