Ил Дархан Аҕа дойдуну көмүскээччи күнүнэн эҕэрдэтэ

Ытыктабыллаах Саха сирин олохтоохторо! Күндү Аҕа дойду Улуу сэриитин кыттыылаахтара, Арассыыйа Федерациятын Сэбилэниилээх Күүстэрин бэтэрээннэрэ, саллааттара уонна эписиэрдэрэ!

Аҕа дойдуну көмүскээччи күнүнэн — норуот бүттүүнүн бырааһынньыгынан ис сүрэхпиттэн эҕэрдэлиибин!

Бу күнү биһиги Аҕа дойдуну көмүскээбит бэтэрээннэрбитигэр уонна бүгүҥҥү көмүскээччилэргэ — дойду национальнай интэриэһин, эйэлээх олоҕу туруулаһа сылдьар буойуннарбытыгар ытыктабылбытын бигэргэтэн туран бэлиэтиибит. Аҕа дойдуну көмүскээччи күнэ биһиги судаарыстыбабыт устуоруйатыгар оҥоһуллубут хорсун быһыылары кэрэһилиир.

Быйылгы сыл — Улуу Кыайыы 80 сыла — Арассыыйаҕа Аҕа дойдуну көмүскээччи, Саха сиригэр Ийэ дойдуну көмүскээччи сылынан биллэриллибитэ. Арассыыйаҕа, Саха сиригэр, биһиэхэ барыбытыгар ураты сыл. Мөлүйүөнүнэн дьон олоҕун толук биэрэн аан дойдуну хара дьайдаах фашизмтан быыһаабыт сэбиэскэй норуот албан аатыгар, сүҥкэн кыайыытыгар ананар. Биһиги Аҕа дойду Улуу сэриитин буойуннарын — аҕаларбытын, эһээлэрбитин кытта алтыспыт дьоллоох көлүөнэ буолабыт. Ол тыыннаах ситими салгыы оҕолорбутугар, сиэннэрбитигэр тиксэрэр ытык иэстээхпит. Дойдубут устуоруйатынан, уопсай кыайыы туһугар аҕа көлүөнэ хорсун охсуһуутунан, күүрээннээх үлэтинэн киэн туттабыт.

Арассыыйа Бэрэсидьиэнэ Владимир Путин Ыйааҕынан “1941–1945 сс. Аҕа дойду Улуу сэриитигэр Кыайыы 80 сыла” үбүлүөйдээх мэтээли олохтообута. Бу мэтээл бойобуой дьайыылар кыттыылаахтарыгар, бартыһааннарга, тыылга үлэлээбиттэргэ, ону сэргэ гражданнар атын категорияларыгар туттарыллыаҕа. Саха сиригэр бастакы үбүлүөйдээх мэтээли Чульмаҥҥа олорор Валерий Спиридоновка, Аҕа дойду сэриитин уордьанын кавалерыгар, 98 саастаах фронтовикка туттарбытым.

Саха сиригэр Аҕа дойду Улуу сэриитин тоҕус бэтэрээнэ олорор. Ытык дьоммутугар улахан болҕомтобутун уурабыт, 2 мөлүйүөн солкуобай кээмэйдээх үбү көрдүбүт. Кинилэри сэргэ харчынан төлөбүр тыыл бэтэрээннэригэр, блокадниктарга, фашистар концлааҕырдарыгар хаайыллыбыттарга, сэрии оҕолоругар оҥоһуллуоҕа.

“Итии туочукаларга” Ийэ дойду интэриэһин турууласпыт бойобуой дьайыылар кыттыылаахтарыгар бүгүҥҥү ытыктабылбытын туһаайабыт.

Кыргыһыы хонуутугар Аҕа дойду көҥүлүн уонна тутулуга суох буолуутун көмүскүү сылдьар, бойобуой дьайыы усулуобуйатыгар буойун ытык иэһин толоро сылдьан бүгүҥҥү бырааһынньыгы көрсөр анал байыаннай дьайыы кыттыылаахтарыгар махтал ураты тылларын уонна истиҥ эҕэрдэбин ыытабын. Сэбилэниилээх Күүстэр кэккэлэрин Саха сирин үгүс уолаттара хаҥаталлар. Биһиги кинилэринэн киэн туттабыт. Ийэ дойду көмүскэлигэр кинилэр модун санааларын, уһулуччулаах хорсун быһыыларын көрдөрөллөр, Ийэ дойдуга дириҥ таптал, андаҕарга бэриниилээх буолуу үрдүк холобурунан буолаллар.

Аҕаларбыт, эһээлэрбит, хос эһээлэрбит хорсун быһыыларын биһиги өйдүү-саныы, кэриэстии сылдьарбыт курдук, үүнэр көлүөнэ дойдуну бүгүҥҥү көмүскээччилэр хорсун быһыыларын эмиэ умнуо суоҕа, биир дойдулаахтарбыт кыайыыларын харыстыаҕа, киэн туттуоҕа.

Улуу дойдубут уйгулаах олоҕун туһугар Аҕа дойдуну көмүскээччилэргэ барыларыгар, байыаннай сулууспалаахтар дьиэ кэргэннэригэр чэгиэн доруобуйаны, ситиһиилэри баҕарабын. Аҕа дойдуну көмүскээччилэргэ уруй-айхал! Кыайыы биһиэнэ буолуоҕа!

Айсен Николаев, Саха Өрөспүүбүлүкэтин Ил Дархана.