Ил Дархан Аҕа дойдуну көмүскээччи күнүнэн эҕэрдэтэ

Ытыктабыллаах Саха сирин олохтоохторо! Күндү биир дойдулаахтарым!

Эһигини ис сүрэхпиттэн Аҕа дойдуну көмүскээччи күнүнэн эҕэрдэлиибин!

Бу – биһиги дойдубутугар ураты суолталаах быраа­һынньык. Модун санааны, хорсун быһыыны, Ийэ дойдуга тапталы уонна бэри­ниилээх буолууну кэрэһилиир. Бу күн биһиги бары дойдубутун дьоруойдуу көмүскээччилэргэ ытыктабылбытын, кинилэринэн киэн туттарбытын биллэрэн, истиҥник махтанабыт.

Олунньу 23 күнүн – норуот бүттүүнүн бы­­рааһынньыгын Арассыыйа судаарыстыбатын дьылҕата быһаарыллар устуоруйа тыҥааһыннаах кэрдиис кэмигэр бэлиэтиибит. Ийэ дойдуну көмүскээбит аҕа көлүөнэ дьоммут курдук, бүгүн биһиги ыччат дьоммут саа-саадах тутан Ийэ дойдубут көҥүлүн уонна тутулуга суох буолуутун, национальнай интэриэһин, суверенитетын туруулаһар. Кыайыыны түөстэринэн тэлбит улуу көлүөнэ удьуордара Аҕа дойду көмүскэлигэр туруннулар.

Сэбилэниилээх Күүстэр ньыгыл кэккэлэригэр Саха сирин үгүс уолаттара кыттыстылар. Ийэ дойдубут ыҥырыытынан саха буойуннара кырдьык иһин кыргыһаллар. Саха сирин дьоно-сэргэтэ ба­­йыаннай дьайыы кыттыылаахтарын, Арассыыйа Федерациятын Сэбилэниилээх Күүстэрин кэккэтигэр быстах хомуурунан ыҥырыллыбыт бары биир дойдулаахтарбыт, «Боотур» этэрээт доброволецтарын, «Алмаас» уонна «Бизон» подразделениелар байыастарын, ба­­йыаннай дьайыыга бастакы күннэртэн кыттыспыт контрактниктарбыт модун санааларынан, хорсун быһыыларынан  киэн туттар.

Өстөөҕү кытта кыргыһыыга биһиги биир дойдулаахтарбыт буойун уонна гражданин быһыытынан үрдүк бэлэмнэрин көрдөрөллөр. Саллааттарбыт уонна эписиэрдэрбит буулаҕа санааларыгар, тулуурдарыгар, сатабылларыгар эркин курдук эрэнэбит.

Саха сирин олохтоохторо байыаннай дьа­йыы бастакы күннэриттэн буойуннарбытын, кинилэр дьиэ кэргэннэрин, босхоломмут сир-­уот олохтоохторун туох кыалларынан өйүүллэр. Гуманитарнай көмөнү тиэйбит эшелоннар тимир суолунан тохтообокко субуллаллар.

Биһиги бүгүн барыбыт олохпут, инникибит туһугар олохторун толук уурбут хорсун буойуннарбыт сырдык кэриэстэригэр сүгүрүйэбит. Биһиги эһэлэрбит, хос эһэлэрбит албан ааттаах хорсун быһыыларын ытыктыырбыт курдук, бүгүн хорсуннук кыргыһа сылдьар дьоммутун кэнэ­ҕэски ыччаппыт умнуо суоҕа, устуоруйабытын билэр уонна харыстыыр буолуоҕа.

Ураты истиҥ тыллары бүгүн Аҕа дойду Улуу сэриитин бэтэрээннэригэр аныыбыт. Эһиги хорсун быһыыгыт бүтүн аан дойдуну быыһаабыта. Москва, Ленинград, Севастополь, Ржев, Сталинград куораттары босхолооһуҥҥа, Курскай Тоҕой кыргыһыытыгар кыттыбыт, Кенигсберг уонна Берлин куораттары ылбыт чулуу көлүөнэ саллааттарын холобурдара кыайыыга кынаттыыр. Ол Улуу Кыайыы бэтэрээннэрэ аҕыйаатылар эрээри, биһиги сүрэхпитигэр кинилэр мэлдьи тыыннаахтар, кинилэр хорсун быһыылара биһиэхэ өрүү холобур буолар.

Байыаннай дьайыы бэтэрээннэригэр уонна кыттыылаахтарыгар, саппааска тахсыбыт ба­­йыаннайдарга, Ийэ дойдуну көмүскээбит уонна көмүскүүр дьоммутугар барҕа махтал!

Аҕа дойдуну көмүскээччилэрбитигэр эйэлээх олоҕу, ыраас халлааны, кытаанах доруобу­йаны, ситиһиилэри уонна чөл туругу баҕарабын! Бырааһынньыгынан!

Айсен Николаев, Саха Өрөспүүбүлүкэтин Ил Дархана