Ил Дархан Айсен Николаев Аан дойду дьахталларын күнүнэн эҕэрдэлиир

Күндү дьахталлар!

Саха Өрөспүүбүлүкэтин салалтатын аатыттан уонна тус бэйэм сааскы сырдык бырааһынньыгынан – Аан дойду дьахталларын күнүнэн эҕэрдэлиибин!

Бу сааскы ылааҥы күн ураты сылаас, истиҥ сыһыаны кэрэһилиир. Күндү ийэлэрбит, кэрэ аҥаардарбыт, эдьиийдэрбит-балыстарбыт, эбээлэрбит, кыргыттарбыт уонна кэллиэгэлэрбит – бу бырааһынньыкка этиллэр махтал, ытыктабыл, таптал тыллара барыта эһиэхэ ананар. Хайа да кэмҥэ дьахтар олоҕу кэрэһилиир, сүргэни көтөҕөр, үрдүккэ кынаттыыр абылаҥ күүстээх.

Саха сирин дьахталлара кэрэ дьүһүннэринэн, талба таһааларынан эрэ буолбакка, мындыр өйдөрүнэн, күүстээх санааларынан, алаһа дьиэҕэ сылаас сыһыаны олохтуур сатабылларынан, дьиэ кэргэн үгэстэрин, сиэр-майгы сыаннастарын ыччакка иҥэрэр дьоҕурдарынан кэрэхсэтэн кэллилэр. Биһиги тыйыс тымныы дойдубутугар эһиги дьиэни-уоту сылаас тыынныыгыт, бигэ туруктуугут, өйү-санааны сааһылыыгыт, хайдахтаах да тургутуулары туоруурга күүс-көмө буолаҕыт.

Саха сирин устуоруйатыгар дьахталлар өрөспүүбүлүкэбит сүһүөҕэр туруутугар уонна сайдыытыгар уһулуччулаах кылааты киллэрбит холобурдара аҕыйаҕа суох. Ол үтүө үгэстэри утумнаан, аныгы кэм дьахталлара идэлэрин үрдүктүк баһылыырга, туруоруллубут сыалы ситиһэргэ сөҕүмэр дьулуурдарынан талбыт идэлэригэр бэриниилэрин көрдөрөллөр. 2024 сылга өрөспүүбүлүкэ экэниэмикэтин араас салааларыгар уонна социальнай эйгэтигэр үлэлиир 23 кэрэ аҥаарга “Үлэ киһитэ” бириэмийэни туттарыы эһиги үтүөҕүтүн үрдүктүк билинии туоһутунан буолар. Күннэтэ толорор кыһамньылаах үлэҕит идэҕэ бэриниилээх буолуу, үлэ үөрүйэхтэрин баһылааһын эһигини ситиһиигэ, билиниигэ сирдииллэрин бигэргэтэр.

Бүгүн ураты махталбын дойдуга бүрүүкээбит билиҥҥи уустук кэмҥэ самныбат санааланыы, Ийэ дойдуга таптал уонна көмөлөһөргө мэлдьи бэлэм буолуу холобурун көрдөрөр дьахталларга тиэрдэбин. Биһигини барыбытын, көҥүлү уонна кырдьыгы көмүскүү сылдьар хоһуун уолаттарбыт чугас дьонноругар, ону тэҥэ волонтердар хамсааһыннарыгар көхтөөхтүк кыттар, анал байыаннай дьайыы кыттыылаахтарын уонна кинилэр дьиэ кэргэннэрин өйүүр, госпиталларга бааһырбыттарга көмөлөһөр, сылаас таҥаһы, маскировка ситимин тигэр, баһыылкалары, аһы-үөлү хомуйар үтүө санаалаах далбар хотуттарга, дьүөгэлэргэ аныыбын. Эһиги кыһамньыгыт, өйөбүлгүт биһиги буойуннарбыт күүстэригэр күүһү эбэр, Ийэ дойду иннигэр ытык иэстэрин чиэстээхтик толороллоругар төһүү буолар. Дьиэ кэргэҥҥэ, дьахталларга, оҕолорго бары өттүнэн көмөнү оҥорорго туһаайыллыбыт бырайыактар, көҕүлээһиннэр, чэпчэтиилэр ахсааннара сылын ахсын эбиллэ турар. Арассыыйа Бэрэсидьиэнэ Владимир Путин көҕүлээһининэн 2025 сылтан саҥардыллыбыт национальнай бырайыактары олоххо киллэрии саҕаланна. Балар ортолоругар “Дьиэ кэргэн” национальнай бырайыак ураты миэстэни ылар. Бырайыак сүрүн сыалынан оҕолоох ыаллары өйүүр усулуобуйаны тэрийии уонна элбэх оҕолонууну тэнитии буолар.

Күндү далбар хотуттар, эдьиийдэр-балыстар, кыргыттар, биһиги инникитин да эһиэхэ анаан кыаллары барытын оҥорорго кыһаллыахпыт! Бүгүҥҥү бырааһынньыкка Саха сирин дьахталларыгар барыларыгар чэгиэн доруобуйаны, дьолу-соргуну, этэҥҥэ буолууну, нус-хас туругу баҕарабын! Эһиги алаһа дьиэҕитигэр таптал уонна өйдөһүү өрөгөйдөөтүн, чугас дьоҥҥут сылаас сыһыана, болҕомтото үөрдэ турдун. Хас биирдии күҥҥүт үөрүүгүтүн үксэттин, үрдүккэ кынаттаатын, оттон туох баар ыра санааҕыт, кэскиллээх былааҥҥыт олоххо ситиһиилээхтик киирдин! Бу сааскы сырдык бырааһынньык сылаас тыына сылы быһа сөҕүрээбэтин, саҥа  кыайыыларга, сүҥкэн ситиһиилэргэ күүһү-эрчими эбиэхтин!

Бырааһынньыгынан, күндү дьахталлар!

Саха Өрөспүүбүлүкэтин Ил Дархана А.С. Николаев