Ил Дархан Айсен Николаев Владимир Путины төрөөбүт күнүнэн эҕэрдэлээтэ

Бүгүн, алтынньы 7 күнүгэр, Владимир Путин төрөөбүт күнүн бэлиэтиир. РФ Бэрэсидьиэнин Саха сирин элбэх омуктаах норуотун аатыттан өрөспүүбүлүкэ Ил Дархана Айсен Николаев эҕэрдэлээтэ.

Эрэгийиэн салайааччыта Владимир Путиҥҥа өрөспүүбүлүкэҕэ куруук болҕомтотун уонна өйөбүлүн иһин махталын биллэрдэ уонна бу хас биирдии Саха сирин олохтооҕор сүҥкэн суолталааҕын бэлиэтээтэ.

«Саха сирин элбэх омуктаах норуотун аатыттан уонна тус бэйэм ааппыттан биһиги Бэрэсидьиэммитин бэлиэ күнүнэн эҕэрдэлиибин. Владимир Владимирович – кытаанах санаалаах уонна муударай лидер, кининэн бүтүн Арассыыйа чиэстээхтик киэн туттар. Кини бигэ туруктаах уонна муударай салайыытынан биһиги дойдубут аан дойду улуу державаларын кэккэтигэр эрэллээхтик бочуоттаах миэстэни ылар, элбэх норуоттар иһин күүс-уох уонна эрэл тирэҕэ буолан турар», – диэн Ил Дархан Айсен Николаев бэйэтин социальнай ситимигэр таһаарбыт эҕэрдэтигэр бэлиэтээтэ.

Ил Дархан Бэрэсидьиэҥҥэ чэгиэн-чэбдик доруобуйаны, дьолу уонна дойду сайдарын-чэчириирин туһугар саҥа ситиһиилэри баҕарда.