Ил Дархан Айсен Николаев Арассыыйа Дьоруойа Дмитрий Куценконы кытта көрүстэ

Ил Дархан Айсен Николаев Арассыыйа Дьоруойа, муора пехотатын десантнай-штурмалыыр подразделениетын хамандыыра, гвардия подполковнига Дмитрий Куценконы кытта көрүстэ. Кини Саха сиригэр уоппускатыгар кэллэ диэн СӨ Ил Дарханын уонна Бырабыыталыстыбатын дьаһалтатын пресс-сулууспата иһитиннэрэр.

«Кыайыы күнүгэр Дьокуускайга Арассыыйа Дьоруойа, биһиги хорсун биир дойдулаахпыт, подполковник Дмитрий Куценко кэллэ. Кинини кытта көрсөммүн уонна өрөспүүбүлүкэ аатыттан эҕэрдэлээммин үөрдүм. Олус истиҥ көрсүһүү буолан ааста. Дмитрий сулууспатын туһунан кэпсээтэ, былааннарын үллэһиннэ, төрөөбүт Өлүөхүмэтин туһунан сылаастык ахтан ааста. Биһиги көмүскээччилэрбитинэн киэн туттабыт. Кинилэр эр санаалара, дьулуурдара биһиэхэ барыбытыгар холобур буолар. Арассыыйа Дьоруойдарыгар эҕэрдэ! Саха сирэ өйдүүр уонна махтанар!» — диэн көрсүһүү туһунан СӨ баһылыга Айсен Николаев эттэ.

Ил Дархан махтанан туран Арассыыйа Дьоруойугар саха быһаҕын туттарда. Дмитрий Куценко Ил Дархҥҥа көмөтүн уонна өйөбүлүн иһин махтанна: «Байыаннай дьайыы буола турар сиригэр Саха сирин көмөтө үгүс, инники кирбиигэ сылдьаммыт дойдубут көмөтүн куруук тутабыт».

Санатан суруйдахха, РФ Бэрэсидьиэнэ Владимир Путин 2024 сыл балаҕан ыйын 9 күнүгэр Дмитрий Куценкоҕа Арассыыйа Дьоруойа ааты иҥэрбитэ.