Ил Дархан Устудьуоннар күннэринэн эҕэрдэлиир

Ытыктабыллаах устудьуоннар уонна преподавателлэр!

Бука барыгытын Арассыыйаҕа Устудьуоннар күннэринэн эҕэрдэлиибин! Киһи олоҕун суолугар бу ураты суолаталаах эдэр саас кэрэ бырааһынньыга.

Устудьуон сыллара – бу ураты, киһи сыаллаах-соруктаах буолар, эппиэтинэһи сүгэрин өйдүүр, ылсыбытын тиһэҕэр тиэрдэргэ дьулуһар кэмнэрэ. Бу сылларга ылбыт билиитэ-көрүүтэ киниэхэ сааһын тухары тирэх буолар: ол курдук идэтин баһылаан эрэ буолбакка, дириҥник ырытан, сыаналаан көрөргө, хамаандаҕа үлэлииргэ, быһаарыыны ылынарга уонна эппиэтинэстээх буоларга көмөлөһөллөр.

Ааспыт 2025 сыл Саха сирин устудьуоннарыгар улахан ситиһиилэрдээх буолла уонна саҥа саҕахтары арыйарга кыаҕы биэрдэ. Өрөспүүбүлүкэҕэ үрдүк үөрэх кыһаларыгар 21 971 устудьуон үөрэнэр, күнүскү үөрэххэ – 15 тыһыынчаттан тахса, маныаха 17 590 оҕо бүддьүөт миэстэтигэр үөрэнэр.

2025 сылга биир бэлиэ түгэнинэн М.К.Аммосов аатынан ХИФУ уонна АГИКИ “Приоритет-2030” федеральнай бырагыраамаҕа кыттыылара буолбута. Култуура уонна ускуустуба Арктикатааҕы судаарыстыбаннай института бырагыраама үһүс бөлөҕөр киирдэ уонна сайдыыга туһуламмыт 100 мөл. кэриҥэ солк. ылыаҕа. Улахан үөрүүлээх уонна бэлиэ түгэнинэн Култуура уонна ускуустуба Арктикатааҕы судаарыстыбаннай института университет аатын сүгүүтэ буолар. Бу өрөспүүбүлүкэбит иһигэр эрэ буолбакка, Уһук Илин уонна Арктика сайдыытын тутаах киинин быһыытынан оруолун бэлиэтиир.

Өрөспүүбүлүкэ ураты киэн туттуута – устудьуоннарбыт ситиһиилэрэ. Хотугулуу-Илиҥҥи федеральнай университет 17 устудьуона уонна магистрана РФ Бэрэсидьиэнин уонна РФ Бырабыыталыстыбатын стипендиаттарынан буолбуттара. Маны сэргэ, 2025 сылга ХИФУ бастакы кууруһун 30 устудьуона  адмирал Г.И. Невельскэй стипендиаттарынан буолбуттара. Бу истипиэндьийэ РФ Бырабыыталыстыбатын Бэрэссэдээтэлин солбуйааччы уонна РФ Бэрэсидьиэнин Уһук Илиҥҥэ Боломуочуйалаах бэрэстэбиитэлэ Юрий Трутнев көҕүлээһининэн, Арассыыйа Бэрэсидьиэнэ Владимир Путин өйөбүлүнэн Уһук Илиннээҕи үрдүк үөрэх кыһаларын бастакы куурустарын устудьуоннарыгар олохтоммута.

Өрөспүүбүлүкэ үрдүк үөрэх сайдыытын утумнаахтык өйүүр, тоҕо диэтэххэ күүстээх университеттар кыахтаах каадырга, научнай уонна технологическай быһаарыыларга, социальнай уонна култуурунай бырайыактарга тирэх буолаллар. 2026 сылга биһиги аныгы үөрэх эйгэтин уонна инфраструктураны тэрийэр үлэни салгыы ыытыахпыт, ол иһигэр бастыҥ үрдүк үөрэх кыһаларын кыаҕын түмэр Дьокуускайга үрдүк үөрэхтэр икки ардыларынааҕы кампустарын бырайыагын хамсатыыны киллэрэн туран.

Муусука үрдүкү оскуолатын саҥа куорпуһун — 150 миэстэлээх уопсайдаах, 240 оҕо үөрэнэригэр  аналлаах үөрэх дьиэтин тутуу үлэтэ тиһиктээхтик салҕанар. Бу бырайыак РФ Бэрэсидьиэнин өйөбүлүнэн олоххо киллэриллэр каадырдары бэлэмниир суолталаах киининэн буолуоҕа.

Күндү устудьуоннар! Эһиги өрөспүүбүлүкэбит инники кэскиллэрэ, саҥа идиэйэлэри илдьэ сылдьааччылар уонна үтүө уларыйыылары киллэрээччилэр буолаҕыт. Эһиги эрчимҥит, айар-тутар кыаххыт, билиигэ-көрүүгэ дьулуһуугут сайдыыга усулуобуйаны тэрийэргэ биһигини көҕүлүүр. Устудьуон олоҕун хас биирдии күнүн сыаналааҥ — бу доҕордуу буолуу, уратыны арыйыы ураты кэмэ.

Эһиэхэ үөрэххэ ситиһиилэри, хорсун былааннары олоххо киллэриини, кытаанах доруобуйаны уонна өрө көтөҕүллүүнү баҕарабын!

СӨ Ил Дархана Айсен Николаев