Ил Дархан Айсен Николаев Авиация уонна Космонавтика күнүнэн эҕэрдэтэ

 Убаастабыллаах Саха сирин олохтоохторо!

Саха Өрөспүүбүлүкэтин уонна Бырабыыталыстыбатын салалтатын аатыттан  эһигини Авиация уонна  Космонавтика күнүнэн итиитик-истиҥник эҕэрдэлиибин!

Хас биирдии Арассыыйа олохтооҕор бу ураты күн. Юрий Гагарин 62 сыллааҕыта аан бастаан киһи-аймах устуоруйатыгар космос куйаарыгар көппүтэ. Бүгүн, төһө да уустук кэм буоллар, биһиги дойдубут космос куйаарын баһылааһыҥҥа инники күөҥҥэ сылдьар. Арассыыйа космонавтиката өрүү  өр сылларга байытыллан кэлбит  научнай технологическай төрүккэ олоҕурар. Ол курдук, күннээҕи олохпутугар туттар космическай технологияларбыт балысханнык сайдаллар. Кинилэр ыксаллаах быһыыттан-майгыттан харыстыыллар,
кэмигэр ойуур баһаарын бохсорго көмөлөһөллөр, балысхан халаан буолуутун сэрэтэллэр.
Биһиги өрөспүүбүлүкэбит уонна космос куйаара быстыбат ситимнээхтэр. Куйаар ситимин чинчийиигэ дьоһуннаах научнай кылаатын сэбиэскэй космофизик, Сталин бириэмийэтин лауреата Юрий Георгиевич Шафер киллэрбитэ. Кини Саха сиригэр бастакы уонна соҕотох  Космофизика институтун тэрийбитэ. Бүгүн   Институт научнай үлэһиттэрэ  астрофизика уонна күн-сир сибээһин салаатыгар фундаментальнай чинчийиилэри ыыталлар.
Биһиги киэн туттабыт отставкаҕа олорор  полковнигынан, байыаннай наука хандьыдаатынан, Ньурба улууһуттан төрүттээх Валентин Капитонович Ивановынан. Кини сэбиэскэй кэмҥэ дойдуга бастакынан космонавт буоларга хандьыдаат этэ. Саха сирин олохтоохторо Ньурбаҕа оҕо сааһа ааспыт Дмитрий Юрьевич Кондратьевынан киэн туттабыт.  РФ лётчик-космонавт, Российскай Федерация Дьоруойа космос куйаарыгар «Союз ТМА-20» хараабылга экипаж хамандыырын быһыытынан көппүтэ.
Бүгүҥҥү күҥҥэ өрөспүүбүлүкэҕэ «Саха сирин космонааба» диэн бырайыак олоххо киирэр. Бу авиационнай-космическай каадырдары бэлэмнииргэ туһаайыллыбыт кэлимник ыытыллар үлэ. Икки Саха сирин олохтооҕо бастакы эригийиэннээҕи сүүмэрдээһини аастылар. Соторутааҕыта Саха сиригэр Константин Эдуардович Циолковскай аатынан Арассыыйатааҕы космонавтика академиятын эригийиэннээҕи Илиҥҥи салаата аһыллыбыта. Сиэксийэни  психологическай наука хандьыдаата Саргылана Егоровна Демиденко салайар. Кини Космонавтары бэлэмниир кииҥҥэ үлэлээбитэ. Кини көҕүлээһининэн  саха оҕолорун авиацияҕа уһуйар «Старт в космос» диэн уопсастыбаннай бырайыак үлэлиир.
«Восточнай» космодрому тутууга өрөспүүбүлүкэттэн 30 тутуу этэрээтин байыаһа кыттыбыта. Дьокуускайтан үрдүкү кылаас үөрэнээччилэрэ  Анатолий Антонов, Андрей уонна Олег Петровтар «Союз-2.1а» ракета-носитель 38 спутнигыттан биирин толкуйдаан оҥорбуттара. Бу спутник Байконур космодромтан  2021 сыллааха ыытыллыбыта.

Күндү доҕоттор!
Эһиэхэ уонна эһиги чугас дьоҥҥутугар дьолу, уйгуну баҕарабын! Эһиги бары саҕалааһыннаргытыгар өрүү  космическай ситиһии аргыстастын!

Саха Өрөспүүбүлүкэтин Ил Дархана Айсен Николаев.