Ил Дархан Айсен Николаев: «Байыаннай эпэрээссийэҕэ сылдьааччыларга көмө хас биирдиилэригэр тиийиэ»

Бүгүн, тохсунньу 17 күнүгэр, Ил Дархан Айсен Николаев «Россия24» ханаалга быһа эпииргэ тахсан, өрөспүүбүлүкэҕэ бүгүҥҥү күҥҥэ турар нэһилиэнньэ ыйытыыларыгар эппиэттээтэ. Өрөспүүбүлүкэ баһылыга бастатан туран бүгүҥҥү күҥҥэ турар сытыы боппуруоска – байыаннай дьайыыларга кытта сылдьар, дойдуларыгар төннөн кэлэн доруобуйаларын чөлүгэр түһэрэ сылдьар байыастарга уонна кинилэр дьиэ кэргэттэригэр оҥоһуллар көмөлөр тустарынан кылгастык кэпсээтэ.
«Байыаннай дьайыылар буола турар сирдэригэр баар Тирэх пууннарбыт бэрэстэбиитэллэрэ миэстэтигэр тиийбит баһыылкалары, Саҥа дьыллааҕы бородуукта нобуорун тиһигин быспакка тириэрдэллэр. Ону таһынан материальнай-техническэй өттүнэн үөскээбит кыһалҕаны, экипировка, таҥас-сап өттүнэн, прибордарынан байыаннай сулууспалаахтарбытын хааччыйабыт. Онтон манан хас биирдиилэрин хааччыйдыбыт диир кыах суох, тоҕо диэтэххэ, сорохтор инники кирбиигэ сылдьалларынан, онно сибээстэһэр кыах суоҕуттан тиийбэт. Ол гынан баран, көмө, баһыылка түгэн көһүннэ эрэ тириэрдиллиэ», – диэтэ Айсен Николаев.

Иккис ыйытыынан байыаннай дьайыылартан кэлбит дьоммут доруобуйаларын чөлүгэр түһэрии туһунан буолла. «Ааспыт сыл ыам ыйыттан аан бастаан байыастарбыт бааһыран кэлбиттэригэр доруобуйаларын чөлүгэр түһэрии бырагырааматын оҥорорго сорук туруорбутум. Онно номнуо биллэр этэ, бу бырагыраама уһун болдьоххо барыахтааҕа. Мэдиссиинэ тэритэлэригэр анал чөлүгэр түһэрии куойкалара аһылланнар эчэйбит байыастарга эмтэнии барар. Итини таһынан, бааһыран эбэтэр уоппускаҕа кэлбит байыастарбыт бэйэлэрин баҕаларынан түргэтэтиллибит мэдиссиинэ өҥөтүн ылар усулуобуйалара оҥуһулунна. Ону таһынан байыаннай сулууспалаахтар дьиэ кэргэттэригэр көмө оҥоһуллар.
Психологическай чөлүгэр түһэриигэ эмиэ улахан болҕомто ууруллан үлэ тэриллэр. Биллэн турар, байыаннай дьайыыларга сылдьыбыт киһи уйулҕата кэһиллэр, маннык көмөҕө бэйэтэ даҕаны, дьиэ кэргэнэ даҕаны наадыйар. Манна Психологическай көмө киинэ көдьүүстээх үлэни оҥорор, номнуо 5000-н тахса психологическай көмө оҥоһулунна. Итинник көмө өссө кэҥиэ, ол туһунан бүгүн Бырабыыталыстыба мунньаҕар эттим уонна Психологическай киин дьиэтин-уотун, үлэтин-хамнаһын кэҥэтэр, усулуобуйатын тупсарар соругу туруордум. Байыаннай эпэрээссийэҕэ сылдьыбыт дьоммут доруобуйаларын чөлүгэр түһэрэргэ өр кэмҥэ үлэлиир эбии Анал мэдиссиинэ киинин тэрийэн туһунан толкуйдуулларыгар соруйдум», – диэтэ Айсен Николаев.