Ил Дархан Айсен Николаев ыйытыыларга хоруйдаата

Бүгүн, олунньу 15 күнүгэр, 13:00 чаастан Ил Дархан Айсен Николаев «Россия 24» ханаалыгар ГТРК «Саха» “Прямой разговор” биэриитигэр кыттан быһа холбонуу кэмигэр киирбит ыйытыыларга хоруйдаата.

Бастакынан Аллайыаха улууһун олохтооҕо Туйаара Алексеева эрийэн тиийдэ. Кини эндокринолог быраас өҥөтүгэр наадыйарын, оттон хоту улуустарга ити курдук биир туһаайыыга үлэлиир быраастар тиийбэттэрин эттэ.

Айсен Николаев итинник кыһалҕа баарын ыйда: “Хомойуох иһин билиҥҥи үбүлээһин чэрчитинэн Арктика эрэгийиэннэригэр анал исписэлиис быраастарынан бастайааннай үлэҕэ ыытар уустук. Ол эрээри, ити кыһалҕаны быһаарар туһуттан, быйыл мобильнай биригээдэлэри тэрийэн ыытыы пилотнай бырайыагын саҕалаатыбыт. Билигин ити курдук биригээдэлэр түөрт хотугу улууска үлэлии сылдьаллар, дьон бу бырайыагы олус үчүгэйдик ылынна. Алҕаһаабат буоллахпына, Аллайыахаҕа итинник биригээдэ кулун тутарга тиийиэхтээх. Биригээдэҕэ эндокринолог быраас чопчу баар буолуоҕа”.

Иккис ыйытааччы аатын-суолун долгуйан эппэтэ, ыйытыыта мобизацияламмыт байыас дьиэ кэргэнин өйөөһүн туһунан буолла: “Аҕата инники кирбиигэ барбыт уол төлөбүрдээх үөрэххэ үөрэнэ сылдьар, истипиэндьийэ ылбат. Кини анал истипиэдьийэ ылар бырааптаах дуо?”

Айсен Сергеевич бу ыйытыыга “Туох да саарбаҕа суох, ити оҕо истипиэндьийэ ылар бырааптаах. Орто да үөрэххэ, үрдүк да үөрэххэ үөрэнэ сылдьар буоллаҕына. Биһиги өрөспүүбүлүкэбитигэр ити боппуруос тута үлэҕэ ылыныллыбыта, мобизацияламмыт биир дойдулаахтарбыт дьиэ кэргэттэрин өйөөһүн биир сүрүн сорукпут. Билигин ити өйөбүлү кэҥэтэргэ үлэлии сылдьабыт, билигин байыастар төннөн кэлэн эрэллэр, кинилэр үөрэххэ туттарыстахтарына эмиэ эбии истипиэндьийэ төлөнүөхтээх. Онон кыһалҕа быһаарыллара уустуктардаах буоллаҕына миэхэ эрийээриҥ эбэтэр 122 нүөмэргэ эрийэн эбии туоһулаһыаххытын сөп”, — диэн хоруйдаата.

Үсүһүнэн Василена Шарина блогер, тойуксут, эрийэн ыйытыытын биэрдэ: “Ийэбинээн хомус үөскээһинин туһунан остуоруйа суруйдубут. Билиҥҥи дьалхааннаах, компьютер үйэтигэр ийэ-оҕо сыһыаныгар, төрүт култуураҕа уһуйар ис хоһонноох. Бу айымньыбытынан мульткиинэ оҥорон таһаарыахпытын баҕарабыт, көмө көрдүүбүт”.

Ил Дархан: “Бырайыак ис хоһооно кэрэхсэбиллээх, үөрэтэн көрүөхпүт”, — диэн эттэ. Сыл аайы блогердары кытта көрсүһүүтүгэр Василена Шарина кэлэн бырайыагын сиһилии кэпсииригэр ыҥырда.

Төрдүс ыйытыыны киин куорат олохтооҕо Наталья Иванова “1000  тиэргэн” салҕанан барыа дуо? Уонна мин тиэргэним ити бырагыраамаҕа киирбитин, суоҕун хантан билиэхпин сөбүй?” диэн ыйытта. Айсен Николаев бырйыак салҕанан бара турарын эттэ. “Саха сирин олохтоохторо бу бырайыагы өрөспүүбүлүкэ үрдүнэн уруйдуу көрсөллөр. Өрөспүүбүлүкэ үрдүнүн 60-тан тахса тиэргэн, ол иһигэр куоракка 21 тиэргэн саҥалыы көрүҥнэнэрэ былааҥҥа баар. Быйыл оҥоһуллар үлэ болдьоҕор, хаачыстыбатыгар, ону кэтээн көрүүгэ ураты болҕомто ууруллуоҕа. Тоҕо диэтэххэ, 2022 сыл туттарыллыбыт сорох үлэлэргэ кэккэ боппуруостар үөскээбиттэрэ”, — диэн хоруйдаата.

Маны сэргэ, атын тиэмэлэр ырытылыннылар. Ол курдук, байыаннай сулууспалаахтар уонна кинилэр дьиэ кэргэттэригэр өйөбүл миэрэлэр, оҕону төрөөбүт дойдуга бэриниилээх буоларга эрдэттэн иитии, Арассыыйа куораттарын тупсаран оҥоруу бырагыраамата уо.д.а. боппуруостары тула кэпсэтии буолла.