Ил Дархан Айсен Николаев дойду субъектарын салайааччыларын национальнай эриэйтинигэр төрдүс миэстэҕэ турар

Ил Дархан Айсен Николаев Арассыыйа субъектарын салайааччыларын национальнай эриэйтинигэр төрдүс миэстэҕэ турар. Эрэгийиэн баһылыктарын үлэлэрин-хамнастарын сыаналыыр чинчийиини бу сыл от — атырдьах ыйдарыгар “Рейтинг” информационнай коммуникациялар кииннэрэ ыыппыт. Түмүгү “Национальнай рейтинг” саайтка таһаарбыттар.

Бу ыйыллыбыт кэмҥэ Ил Дархан эриэйтинэ бөҕөргүүрүгэр дойду баһылыга кинини РФ Судаарыстыбаннай Сэбиэтин президиумун састаабыгар “Энэргиэтикэ” хайысхатыгар хамыыһыйа бэрэссэдээтэлинэн анаабыта суолталаах диэн эспиэртэр быһаарбыттар.

Саха сирин баһылыга, Арассыыйа бэрэсидьиэнэ Курскай уобалаһы өйүүр дьыалаҕа ыҥырыытыгар, Курскайга гуманитарнай көмөнү уонна волонтердар этэрээттэрин ыыттаран биир бастакынан холбоспута диэн этэллэр. Итиэннэ дойдуга бүгүҥҥү күҥҥэ ордук суолталаах быһаарыыга кылааты киллэрэр сорудаҕынан анал байыаннай дьайыы байыастарыгар аналлаах саҥа оҥоһугу – квадроциклы,  электро матасыыкылы, экипировканы, сублимированнай аһылыгы Москваҕа “Юнармия” пуорумугар өрөспүүбүлүкэ экспозицияны туруорбута, билиһиннэрбитэ эмиэ биллибэккэ-көстүбэккэ хаалбатаҕын ыйаллар.

Эрэгийиэн кыһалҕатын үлэтигэр Айсен Николаев Саха Өрөспүүбүлүкэтин экэнэмиичэскэй сайдыытын хааччыйыыга суһал ыстаап президумун мунньаҕын ыыппытын эспиэртэр бэлиэтииллэр. Үөрэх эйгэтигэр көхтөөх үлэтэ эмиэ болҕомтону тардар: Саха сиригэр хаһан даҕаны бүгүҥҥү курдук элбэх оскуола тэҥинэн тутуллубатаҕа. Саха сирэ университеттар кампустарын ситимин тэрийиигэ федеральнай бырагыраамаҕа кыттыыга сайаапката бэлиэ төрүөтүнэн буолар. Манна үлэ үтүө түмүктэрин Саха сиригэр кэлэ сылдьыбыт РФ бырабыыталыстыбатын бэрэссэдээтэлин солбуйааччы Дмитрий Чернышенко бэлиэтээбитэ. Вице-премьер Айсен Николаевы кытта М.К.Аммосов аатынан Хотугулуу-Илиҥҥи федеральнай университекка сылдьан үрдүк үөрэх кыһатын сайдыытын бырайыагын кытта билсибитэ. Ону таһынан, вице-премьер Ил Дарханы кытта үөрэх, успуорт, туризм сайдыытын боппуруостарын дьүүллэспиттэрэ.

Өрөспүүбүлүкэ экэниэмикэтин өрө таһаарыы салааларын суолталаах кыһалҕаларын бырагыраамата Ил Дархан тус хонтуруолугар сылдьар. Чуолаан, Арассыыйаҕа креативнай индустрияны сайыннарыы туһунан Судаарыстыбаннай Дуума ылбыт федеральнай сокуонун сыаналааһыҥҥа, Айсен Николаев креативнай индустрияны сайыннарыы экэниэмикэ уонна киһи хапытаала сайдыытыгар быһаччы дьайар диэн “Создано на Дальнем Востоке” креативнай индустрия пуорумугар эппитэ. Ааспыт алта сыл устата өрөспүүбүлүкэҕэ креативнай экэниэмикэ экоситиэмэтэ тэрилиннэ итиэннэ эрэгийиэн бу эйгэҕэ Арассыыйаҕа  инники күөҥҥэ сылдьар.

Айсен Николаев эрэгийиэҥҥэ цифровой трансформацияҕа каадыры бэлэмнээһиҥҥэ ураты болҕомтону уурар.

Ил Дархан “административнай репутациятыгар”, национальнай эриэйтин түмүгүнэн, кини РФ субъектарыгар инвестиционнай килиимэт туругун мунньаҕын ыытыыта федеральнай бэбиэскэҕэ киирбит уонна биһирэммит.

Быйыл өрөспүүбүлүкэ биисинэһи үлэлэтиигэ табыгастааҕынан дойду эрэгийиэннэрин ортолоругар 14-с миэстэҕэ сылдьар. Итини таһынан, Саха сирэ иккис сылын субуруччу “Регуляторная среда” хайысхаҕа Арассыыйа субъектарын кэккэтигэр биэс бастыҥнар (ТОП-5) кэккэлэригэр киирэр. Эрэгийиэҥҥэ инвестиционнай цикл 38 % кыччаабытын, 1 360-тан 844 үлэ күнүгэр диэри диэн чопчулууллар. Бу Саха сирин салайааччыларын хамаандата көдьүүстээх үлэтин түмүгүн туоһулуур диэн бэлиэтээччилэр ыйаллар. Саха сирэ өрүү федеральнай бэбиэскэҕэ сылдьар. Айсен Николаев “Национальнай рейтинг” инники бөлөҕөр сылдьара оруннааҕын эспиэртэр улахан аҥаардара этэллэр.