Ил Дархан Айсен Николаев эҕэрдэтэ

Ил Дархан Айсен Николаев нэһилиэнньэни олох-дьаһах, коммунальнай өҥөнөн хааччыйар хаһаайыстыба үлэһиттэрин күнүнэн үлэһиттэри уонна бэтэрээннэри эҕэрдэлиир.

Нэһилиэнньэни олох-дьаһах уонна коммунальнай өҥөнөн хааччыйар хаһаайыстыба ытыктабыллаах үлэһиттэрэ уонна бэтэрээннэрэ!

Өрөспүүбүлүкэ салалтатын уонна тус бэйэм ааппыттан эһигини эҕэрдэлиибин!

Бу тутаах хайысханы быһаарарга — мөлүйүөнүнэн дьон олоҕун холку уонна бигэ буолуутун быһаарарга анаммыт араас идэлээх исписэлиистэри түмэр бэлиэ күн. Бу биһиги өрөспүүбүлүкэбитигэр — РФ саамай улахан эрэгийиэнигэр ордук улахан суолталаах.

Эһиги талан ылбыт идэҕитинэн уонна күн ахсын сыралаах үлэҕитинэн куораттарга уонна бөһүөлэктэргэ табыгастаах усулуобуйалар тэриллэллэр, онтон дойдубут олохтоохторо күннээҕи өҥө оҥоһуллуутун хаачыстыбатыгар эрэллээх буолуохтарын сөп. Эһиги дьиэни-уоту, оскуолалары, балыыһалары, уһуйааннары, тэрилтэлэри сылааһынан, сырдыгынан, уунан хааччыйаҕыт. Эбийиэктэр этэҥҥэ буолууларын көрөҕүт-истэҕит, подъезтар уонна уулуссалар, нэһилиэнньэлээх пууннар тулалыыр эйгэлэрэ  ыраас буоларыгар кыһамньыгытын уураҕыт.

Олох-дьаһах коммунальнай хаһаайыстыбата — бу хас биирдии киһи этэҥҥэ олоруутун сүрүнэ. Саха сирин тыйыс килиимэтигэр эһиги үлэҕит-хамнаскыт ордук суолталанар:  олоҕу-дьаһаҕы хааччыйар ситим тохтоло суох үлэтэ — бу табыгастаах усулуобуйаны тэрийии эрэ буолбакка, бу дьон олоҕор-дьаһаҕар куттал суох буолуутун мэктиэлээһининэн буолар. Эһиги бу судургута суох соруктары чиэстээхтик толороҕут, итинэн бэйэҕит үлэҕитигэр бэриниилээххитин, сатабылгытын, кыһамньыгытын көрдөрөҕүт.

Ааспыт сыл биһиэхэ коммунальнай инфраструктураны сайыннарыыга биллэр-көстөр ситиһиилэрдээх буолла.  Биһиги 193, 8 МВт кыамталаах 14 хочуолунайы үлэҕэ киллэрдибит, онон итиинэн хааччыйыы биллэ үрдээтэ. «Ыраас уу» бырагыраама иитинэн, ыраас иһэр уунан хааччыйар эбийиэктэр тутуллаллар. Бу ситиһиилэр — эһиги сыралаах үлэҕит түмүктэрэ.

Биһиги иннибитигэр далааһыннаах үлэлэр күүтэллэр — уунан хааччыйар эбийиэктэри, хочуолунайдары тутууну салҕааһын, инженернэй ситимнэргэ хапытаалынай өрөмүөннэр ыытыллыылара. Эһиги үлэҕитигэр улахан үөрүйэххитинэн уонна сатабылгытынан, өрөспүүбүлүкэ коммунальнай салаатын тупсарыыга туһуламмыт былааннаргытын ситиһиилээхтик олоххо киллэрэргитигэр эрэнэбин.

Бу салаа бэтэрээннэригэр туһаайан этиэхпин баҕарабын. Эһиги үлэҕитигэр үөрүйэххит, муударай өйгүт-санааҕыт, дьыалаҕытыгар бэриниилээх буолуугут эдэр көлүөнэни үлэҕэ көҕүлүүр уонна барыбытыгар үтүө холобур буолар. Эһиги өрөспүүбүлүкэ уонна дойду сайдыытын, Саха сирин хас биирдии олохтооҕун туһугар кыһамньыгытыгар улахан махтал.

Эһиги үтүө суобастаах үлэҕит уонна Сахабыт сирин сайдыытыгар сүҥкэн кылааккыт иһин махтанабын. Эһиэхэ дьолу-соргуну, этэҥҥэ буолууну, кытаанах доруобуйаны, үлэҕитигэр саҥа ситиһиилэри уонна өрөспүүбүлүкэ дьонун-сэргэтин олоҕо этэҥҥэ буолуутун туһугар наадалаах, туһалаах үлэҕитигэр ситиһиилэри баҕарабын!

Саха Өрөспүүбүлүкэтин Ил Дархана Айсен Николаев