Ил Дархан Айсен Николаев Өймөкөөн улууһугар халаантан эмэсэҕэлээбит дьону кытта көрүстэ

От ыйын 26 күнүгэр Ил Дархан Айсен Николаев халаан уутуттан эмсэҕэлээбит Өймөкөөн улууһун олохтоохторун кытта көрүстэ, санааларын иһиттэ.

Бүгүҥҥү күҥҥэ нэһилиэнньэлээх пууннар ууттан босхоломмуттара, чөлүгэр түһэрэр үлэлэр ыытыллаллар. Эрэгийиэннээҕи суолталаах «Өймөкөөн» суолу атырдьах ыйын 2 күнүгэр диэри оҥорор былааннаахтар. Эмсэҕэлээбит дьонтон материальнай көмөҕө сайабылыанньалары хомуйаллар, бастакы төлөбүрдэри ылан эрэллэр.

Халаан уутуттан Өймөкөөн сэлиэнньэтэ ордук эмсэҕэлээтэ. Манна биэс чааһынай дьиэ бүтүннүү алдьаммыт, итиэннэ 110 дьиэ капитальнай өрөмүөҥҥэ наадыйар.

«Мин олохтоохтору кытта көрсөрүм, туох көмө оҥоһуллуон сөбүн өйдүүрүм наада. Ыйытыы олус элбэх — оттук сезонуттан саҕалаан материальнай көмөҕө тиийэ. Оту бэлэмнээһин туһунан туспа кэпсэтии тахсар, дьон сирдэрэ ууга барда. Бу уонна да атын ыйытыылары мунньахха быһаарсыахпыт», — диэтэ Айсен Николаев.

Дьиэлэрэ бүтүннүү урусхалламмыт биэс ыал саҥа дьиэлэри ылыахтара. Түөрт ыал тутулла турар түөрт кыбартыыралаах дьиэҕэ көһүөхтэрэ, бэһис ыал эмиэ дьиэнэн хааччыллыаҕа.

Сиһилии: https://www.sakha.gov.ru/news/8926